پہلی نوکری کا پہلا دن، پہلی بار کراچی آنے والے فیضان کو موت نے اُچک لیا

کراچی کے علاقے ڈیفنس میں کے الیکٹرک کے سب اسٹیشن میں کرنٹ لگنے سے جاں بحق ہونے والے 19 سالہ فیضان کے چچا کا کہنا ہے کہ ان کا بھتیجا سیلفی لینے کے دوران کرنٹ لگنے سے جاں بحق ہوا۔

خیال رہے کہ آج صبح کراچی کے علاقے ڈیفنس فیز 7 میں کے الیکٹرک کے سب اسٹیشن میں کرنٹ لگنے سے فیضان جاں بحق ہوگیا تھا۔

متوفی نوعمر لڑکے کے چچا محمد فیاض کے مطابق مانسہرہ کے علاقے ماڑی مکرب شاہ کے رہائشی ان کے بھائی فدا محمد ٹرانسپورٹر تھے جن کا کچھ عرصہ قبل انتقال ہوگیا، مرحوم کے بیٹے 19 سالہ محمد فیضان کو انہوں نے مانسہرہ سے کراچی کے درمیان چلنے والی بس سروس پر کنڈیکٹر رکھوایا تھا۔

ڈیفنس میں کے الیکٹرک کے سب اسٹیشن میں کرنٹ لگنے سے ایک شخص جاں بحق

سب اسٹیشن سے تار چوری کے دوران کرنٹ لگنے کے باعث افسوس ناک واقعہ پیش آیا ہے، ترجمان کے الیکٹرک

محمد فیاض کے مطابق ان کا بھتیجا فیضان بس کے پہلے ہی چکر  پر پہلی بار 10 اگست کی رات کراچی پہنچا تھا اور اس نے بس کے ساتھ 11 اگست کی سہہ پہر 4 بجے واپس مانسہرہ روانہ ہو جانا تھا۔

 فیاض کے مطابق قیوم آباد سی ایریا میں ان کے گھر کے ساتھ ہی بس کے آخری اسٹاپ پر گاڑی کھڑی کروا کر رات کو فیضان ان کے گھر پر آ کر ٹھہرا تھا اور  صبح ناشتہ کرکے چھوٹے بچوں کے ساتھ گلی محلے میں گھومنے کے لیے نکلا تھا۔

چچا کے مطابق نوعمر فیضان قیوم آباد سے ملحق ڈیفنس فیز 7 میں زبیر مسجد کے قریب کے الیکٹرک کے سب اسٹیشن کے ساتھ کھڑا ہو کر موبائل فون سے سیلفی بنا رہا تھا کہ دیوار میں کرنٹ پھیلنے کی وجہ سے چپک کر ہلاک ہو گیا۔

 پولیس کے مطابق کے الیکٹرک کے سب اسٹیشن کا مرکزی دروازہ موجود نہیں تھا جس بناء پر بچے کھیلتے ہوئے سب اسٹیشن کے اندر چلے گئے تھے جہاں اندر کی دیوار کے ساتھ فیضان کو کرنٹ لگا۔

کرنٹ سے ہلاکتوں پر کے الیکٹرک کیخلاف قتل کے کیس بنائے جائیں: چیف جسٹس

پوری انتظامیہ کیخلاف مقدمہ درج کریں، ہر مقدمے میں سی ای او کے الیکٹرک کا نام درج کیا جائے، چیف جسٹس، سی ای او کے الیکٹرک کا نام ای سی ایل میں ڈالنے اور ادارے کے مکمل آڈٹ کا بھی حکم

 22 اگست کو متوفی کی اکلوتی بہن کی شادی بھی طے کی جاچکی ہے۔  پولیس کے مطابق ضابطے کی کارروائی کے بعد میت لواحقین کے حوالے کر دی گئی ہے۔

سیلفی بنانے کے دوران کرنٹ لگنے سے جاں بحق ہونے والا 19 سالہ فیضان بس پر کنڈکٹر کی پہلی نوکری کے پہلے دن پہلی بار کراچی آیا تھا اور اس  نے پیر کی شام قیوم آباد سے اسی بس پر گاؤں واپس لوٹ جانا تھا مگر اب اسی بس پر اس کی میت مانسہرہ روانہ کر دی گئی ہے۔

کراچی میں کرنٹ لگنے کے حادثات کا کے الیکٹرک سے کوئی تعلق نہیں: ترجمان

کرنٹ لگنے کے حادثات غیر قانونی کنڈوں اور برقی آلات کے غیر محفوظ استعمال کے باعث پیش آتے ہیں: ترجمان کے الیکٹرک

دوسری جانب ترجمان کے الیکٹرک نے واقعے پر افسوس کا اظہار کرتے ہوئے الزام لگایا ہے کہ ابتدائی معلومات کے مطابق ایک شخص کے الیکٹرک کے سب اسٹیشن سے تار چوری کر رہا تھا۔

ترجمان کا کہنا ہے کہ سب اسٹیشن سے تار چوری کے دوران ہی کرنٹ لگنے کے باعث افسوس ناک واقعہ پیش آیا ہے۔