نیب آفس کے باہر سے گرفتار لیگی کارکنان ضمانت پر جیل سے رہا
14 اگست ، 2020
مریم نواز کی پیشی کے موقع پر نیب آفس کے باہر ہنگامہ آرائی کے الزام میں گرفتار لیگی کارکنوں کو ضمانت کے بعد جیل سے رہا کر دیا گیا۔
جیل سے رہا ہونے والے کارکنوں کا کیمپ جیل لاہور کے باہر دیگر لیگی کارکنوں نے استقبال کیا اور ان پر پھول نچھاور کیے۔
رکن پنجاب اسمبلی خواجہ عمران نذیر بھی اس موقع پر موجود تھے، انہوں نے میڈیا سے گفتگو کرتے ہوئے کہا کہ عمران نیازی جتنے بھی مقدمے بنانا چاہتے ہیں بنا لیں، انہیں گھر بھجوا کر ہی دم لیں گے۔
عمران نذیر نے الزام عائد کیا کہ نیب آفس کے باہر جو کچھ ہوا اس کی منصوبہ بندی فیاض چوہان نے کی تھی۔
مسلم لیگ ن کے رہنما کا کہنا تھا کہ نیب آفس کے باہرگرفتار ہونے والے کارکنوں نے ووٹ کو عزت دو کا عملی مظاہرہ کرکے تاریخ رقم کر دی ہے۔
