آصف زرداری کیخلاف جعلی اکاؤنٹس کیس میں اہم موڑ، مرکزی گواہ اسلم مسعود انتقال کرگئے

سابق صدر آصف زرداری کے خلاف جعلی اکاؤنٹس کیس میں اہم موڑ آگیا اور اس کیس میں قومی احتساب بیورو (نیب) کے مرکزی گواہ اومنی گروپ کے اکاؤنٹنٹ اسلم مسعود انتقال کرگئے۔

جعلی اکاؤنٹس کیس کے اہم ملزم اسلم مسعود کا راہداری ریمانڈ منظور

ملزم اسلم مسعود کو انٹرپول کے ذریعے سعودی عرب سے گرفتار کر کے پاکستان لایا گیا تھا۔

نیب ذرائع کے مطابق اسلم مسعود راولپنڈی کے اسپتال میں زیر علاج تھے جہاں ان کا انتقال ہوا۔

نیب ذرائع نے بتایا کہ اسلم مسعود اومنی گروپ اور آصف زرداری کے خلاف وعدہ معاف گواہ تھے اور انہیں سعودی عرب سے پاکستان منتقل کیا گیا تھا۔

دوسری جانب سپرنٹنڈنٹ اڈیالہ جیل نے اسلم مسعود کی وفات کی رپورٹ احتساب عدالت میں جمع کرادی ہے جس کے مطابق قیدی اسلم مسعود کو 20 فروری 2019 کو اسپتال داخل کرایا گیا تھا اور اسی روز قیدی کو ہنگامی بنیادوں اسپتال ریفرکردیا گیا تھا۔

سپرنٹنڈنٹ اڈیالہ جیل نے کہا ہے کہ بدقسمتی سے قیدی آج اسپتال میں حرکت قلب بند ہونے سے وفات پاگیا لہٰذا عدالت قیدی کے پوسٹ مارٹم کے اجازت دے۔

خیال رہے کہ فروری 2019 میں اومنی گروپ کے سابق عہدے دار اسلم مسعود کو سعودی عرب سے انٹرپول کے ذریعے گرفتار کرکے پاکستان لایا گیا تھا۔