نوازشریف کو برطانیہ سے پاکستان لانا کافی مشکل کام ہے: گورنر پنجاب

گورنر پنجاب چوہدری محمد سرور  نے کہا ہے کہ سابق وزیراعظم نوازشریف کو برطانیہ سے پاکستان لانا کافی مشکل کام ہے لیکن عدالت کرسکتی ہے۔

گورنر پنجاب چوہدری محمد سرور کا چیمبر آف کامرس میں گفتگو کرتے ہوئے کہنا تھا کہ ملکی معیشت کو سنبھالا دینے میں تاجر برادری کا بڑا ہاتھ ہے اور تاجر برادری کی مدد کے بغیر خسارہ کم کرنا ممکن نہیں، کورونا بحران سے نمٹنے کے لیے بھی تاجر برادری نے بڑھ چڑھ کر حصہ لیا۔

نواز شریف کو فوراً وطن واپس لانا چاہیے، تمام قانونی پہلوؤں کا جائزہ لیا جائے، وزیراعظم

کسی بھی قسم کی بلیک میلنگ برداشت نہیں کریں گے، نواز شریف کو واپس لانا حکومت کی ذمہ داری ہے، وفاقی کابینہ اجلاس میں عمران خان کی گفتگو

انہوں نے مزید کہا کہ جو لوگ بھی برطانیہ جاتے ہیں، انہیں واپس لانے میں مشکلات آتی ہیں کیونکہ برطانیہ اور پاکستان میں کسی کو اپنے ملک لانے کا کوئی معاہدہ نہیں، اگر عدلیہ کہے گی تو میں سمجھتا ہوں برطانیہ کی حکومت ان کو واپس بھیج دے گی۔

گورنر پنجاب کا کہناتھا کہ اگر نیب میں کسی پر الزام ثابت ہوجائے تب استعفیٰ دینا بنتا ہے، وزیراعلیٰ پنجاب عثمان بزدار کے خلاف ابھی کوئی الزام ثابت نہیں ہوا ہے۔

انہوں نے کہا کہ میں اداروں کو بند کرنے کے حق میں نہیں ہوں، ہر شخص کو انصاف جلد ملنا چاہیے، نیب کے پاس بھی کئی کئی سال کیس پڑے رہتے ہیں، نیب کے ادارے میں بھی اصلاحات ہوسکتی ہیں لیکن نیب کو بند کرنا ملک میں کرپشن کو جائز قرار دینے کے مترادف ہے۔

خیال رہے کہ گزشتہ دنوں سابق وزیراعظم نواز شریف کی لندن کی اسٹریٹس پر بیٹے کے ساتھ چہل قدمی کی نئی تصویر سوشل میڈیا پر وائرل ہوئی ہے جس پر حکومت کی جانب سے تنقید کی جارہی ہے۔

اس تصویر کے وائرل ہونے کے بعد حکومت کی جانب سے اعلان کیا گیا ہے کہ نواز شریف بیماری کا بہانہ بناکر چلے گئے، انہیں واپس لانا ضروری ہوگیا۔

جب کہ نوازشریف کی میڈیکل رپورٹس سے متعلق بھی بعض حکومتی وزرا نے شکوک و شبہات کا اظہار کیا ہے تاہم وزیر صحت پنجاب یاسمین راشد نے نوازشریف کی میڈیکل رپورٹس میں جعل سازی کی تردید کی ہے۔