ایس ای سی پی کے لاپتہ افسر کو پیر تک بازیاب کرانے کا حکم

اسلام آباد ہائیکورٹ نے سیکیورٹیز اینڈ ایکسچینج پاکستان (ایس ای سی پی) کے لاپتہ افسر ساجد گوندل کو پیر تک بازیاب کرانے کا حکم دے دیا۔

چیف جسٹس اطہر من اللہ نے مغوی کی والدہ کی درخواست پر احکامات جاری کیے۔

عدالت نے حکمنامے میں کہا کہ پیر کو دو بجے تک ساجد گوندل بازیاب نہ ہوئے تو سیکرٹری داخلہ خود پیش ہوں۔

SECP کے اعلیٰ افسر ساجد گوندل لاپتا

ساجد گوندل کل شام سے گھر واپس نہیں آئے اور ان کی گاڑی زرعی تحقیقاتی مرکز شہزاد ٹاؤن کے قریب کھڑی ملی ہے: اہلخانہ

چیف جسٹس اسلام آباد ہائیکورٹ نے کہا کہ ساجد گوندل کی عدم بازیابی کی صورت میں چیف کمشنر اور آئی جی پولیس بھی عدالت پیش ہوں۔

اسلام آباد ہائیکورٹ نے ایس ای سی پی کے جوائنٹ ڈائریکٹر کے اغوا کا معاملہ وفاقی کابینہ کے سامنے رکھنے کا بھی حکم دیا۔

عدالت نے آج کے حکمنامے کی کاپی سیکرٹری کابینہ ڈویژن کو بھیجنے کی ہدایت بھی کی۔