16 ستمبر ، 2020 
اپوزیشن عددی اکثریت کے باوجود حکومتی بلوں کی منظوری نہ روک سکی
16 ستمبر ، 2020
اپوزیشن عددی اکثریت کے باوجود پارلیمنٹ کے مشترکہ اجلاس میں حکومتی بلوں کی منظوری نہ روک سکی۔
دونوں ایوانوں میں مجموعی طور پر اپوزیشن کے پاس حکومتی بینچز سے 10 زیادہ ووٹ موجود ہیں۔
پارلیمنٹ کے مشترکہ اجلاس میں حکومتی ارکان کی مجموعی تعداد 217 ہے جن میں سے 200 اجلاس میں شریک اور 16غیرحاضر تھے جب کہ اسپیکر رائے شماری کے عمل میں حصہ نہیں لیتے۔
پارلیمنٹ میں اپوزیشن ارکان کی مجموعی تعداد 226 ہے جن میں سے اپوزیشن کے 190 ارکان نے مشترکہ اجلاس میں شرکت کی اور 36 غیر حاضر رہے۔
اپوزیشن کے 36 ارکان کی غیر حاضری کی وجہ سے آج مشترکہ اجلاس میں اپوزیشن کی عددی اکثریت اقلیت میں بدل گئی اور 7 بلز منظور کیے گئے جن میں سے 4 بل ایجنڈے میں شامل تھے جب کہ تین ضمنی ایجنڈے کے تحت شامل کیے گئے۔
خیال رہے کہ اپوزیشن کی جانب سے اسپیکر قومی اسمبلی اسد قیصر پر جانبداری کا الزام عائد کیا گیا ہے اور بل پر ارکان کی گنتی میں ردوبدل کا الزام لگایا گیا ہے۔
