وزیراعظم نے ایک بار پھر پوری قوم کا سر فخر سے بلند کر دیا: شبلی فراز

وفاقی وزیر برائے اطلاعات و نشریات سینیٹر شبلی فراز کا کہنا ہے کہ وزیراعظم عمران خان نے اقوام متحدہ کی جنرل اسمبلی سے خطاب میں کشمیر کا مسئلہ بھرپور طریقے سے دنیا کے سامنے اٹھایا۔

سوشل میڈیا پر جاری اپنے بیان میں شبلی فراز کا کہنا تھا وزیراعظم عمران خان نے ایک بار پھر تاریخی خطاب کرکے پوری قوم کا سر فخر سے بلند کر دیا، وزیراعظم نے کشمیریوں کا مقدمہ دنیا کے سامنے ڈٹ کر پیش کیا۔

جنرل اسمبلی خطاب: وزیراعظم کا بھارت کو انتباہ، کشمیر، گستاخانہ خاکوں اور فلسطین پر گفتگو

بھارت نے مہم جوئی کی تو ایسی قوم سے نبردآزما ہونا پڑے گا جو آخری دم تک لڑنے کا عزم رکھتی ہے، امیر ملک منی لانڈرنگ کرنیوالوں کو تحفظ دیکر انصاف کی بات نہیں کرسکتے، عمران خان

سینیٹر شبلی فراز کا کہنا تھا کہ مسئلہ کشمیر حل کیے بغیر خطے میں امن کا قیام ایک خواب رہے گا۔

ان کا یہ بھی کہنا تھا کہ وزیراعظم نے اقوام عالم کو باور کرایا کہ کشمیریوں کے حق خود ارادیت کو پامال کیا جا رہا ہے۔

شبلی فراز کا کہنا تھا عمران خان نے آر ایس ایس کے انتہا پسند نظریے اور بھارت میں مسلمانوں پر ڈھائے جانے والے مظالم کو بےنقاب کیا۔

ان کا کہنا تھا اس کے علاوہ وزیراعظم نے منی لانڈرنگ کے ذریعے بیرون ملک بھیجے گئے چوری کے پیسےکی واپسی کے لیے فریم ورک کے خلاف پختہ عزم کا واضح اظہار کیا اور کورونا وبا سمیت تمام اہم عالمی امور پر گفتگو کی۔