قیادت پر تنقید: فردوس شمیم نے اپوزیشن لیڈر کے عہدے سے استعفیٰ دے دیا

کراچی: پی ٹی آئی قیادت کی جانب سے استعفیٰ طلب کیے جانے کے بعد سندھ اسمبلی میں اپوزیشن لیڈر فردوس شمیم نقوی مستعفی ہوگئے۔

کراچی گیس بحران: فردوس شمیم پہلے اپنے ہی وزیراعظم پر برسے اور پھر معذرت کر لی

وزیر توانائی عمر ایوب اور معاون خصوصی ندیم بابر بھی سنیں، گیس بحران کے معاملے پر شور مچاؤں گا اور شرم بھی دلاؤں گا: فردوس شمیم نقوی

پی ٹی آئی رہنما اور سندھ اسمبلی میں اپوزیشن لیڈر فردوس شمیم نقوی نے چند روز قبل کراچی میں گیس بحران پر اپنی ہی حکومت پر شدید تنقید کی تھی اور ساتھ ہی وزیراعظم عمران خان کو بھی تنقید کا نشانہ بنایا تھا۔

بعد ازاں فردوس شمیم نقوی نے اپنے بیان پر ٹوئٹ کے ذریعے معذرت بھی کی تھی لیکن پی ٹی آئی کی مرکزی قیادت نے فردوس شمیم سے استعفیٰ طلب کیا۔

گورنر سندھ کی تصدیق

گورنر سندھ عمران اسماعیل نے سندھ اسمبلی میں اپوزیشن لیڈر فردوس شمیم نقوی کے استعفے کی تصدیق کی ہے۔

عمران اسماعیل کا کہنا تھا کہ فردوس شمیم نقوی نے استعفیٰ اسی روز معذرت کرنے کےبعد دے دیا تھا تاہم اس حوالے سے ابھی وزیر اعظم نے کوئی فیصلہ نہیں کیا۔

گورنر سندھ نے کہا کہ  فردوس شمیم نقوی نےاخلاقی بنیاد پراستعفی مجھے دیا ہے۔