صحت و سائنس

کورونا وائرس جلد پر کتنی دیر تک زندہ رہ سکتا ہے؟ تحقیق کے نتائج سامنے آ گئے

06 اکتوبر ، 2020

کورونا کے علاوہ انفلوئنزا وائرس جلد پر 1.8 گھنٹے تک زندہ رہ سکتا ہے، تحقیق—

عالمی وبا کورونا وائرس کے حوالے سے متعدد تحقیقات سامنے آئی تھیں کہ وائرس کس سطح پر کتنی دیر تک زندہ رہ سکتا ہے لیکن ان تحقیقات میں یہ بات سامنے نہیں آئی تھی کہ وائرس انسانی جِلد پر کتنی دیر تک رہ سکتا ہے۔

حال ہی میں سائنسدانوں کی جانب سے لیبارٹری میں تجربہ کیا گیا کہ کورونا وائرس جِلد پر کتنی دیر تک رہ سکتا ہے۔

یہ بھی پڑھیں

جاپان کی کیوٹو پریفیکچورل یونیورسٹی آف میڈیسن کی ایک ٹیم نے وبا سے بچنے کے لیے ہاتھ دھونے کی اہمیت کو اجاگر کرنے کے لیے ایک تحقیق کی ہے۔

جرنل آف کلینیکل انفیکشیئس ڈیزیز میں شائع ہونے والی تحقیق میں سائنسدانوں نے جلد پر کورونا وائرس کے نمونوں کے ساتھ ساتھ انفلوئنزا وائرس کے نمونوں کا بھی تجربہ کیا۔

تحقیق میں یہ بات سامنے آئی کہ کورونا وائرس جلد پر 9 گھنٹے جب کہ انفلوئنزا وائرس جلد پر تقریباً پونے دو گھنٹے یعنی 1.8 گھنٹے تک زندہ رہ سکتا ہے۔

دوسری جانب سائنسدانوں نے بتایا کہ جب کورونا وئرس کو اپر ریسپائریٹری ٹریک سے حاصل کیے جانے والے بلغم کے ساتھ ملا کر جانچا گیا تو یہ 11 گھنٹوں تک زندہ رہا۔

سائنسدانوں نے مزید بتایا کہ دونوں وائرس 80 فیصد الکوحل والے ہینڈ سینیٹائزر لگانے کے بعد 15 سیکنڈز کے اندر اندر ہی ختم ہوگئے۔

انہوں نے بتایا کہ اس تحقیق سے یہ بات سامنے آئی ہے کہ عالمی وبا کورونا وائرس سے بچنے کے لیے ہاتھ کی صفائی بے حد ضروری ہے۔