ڈونلڈ ٹرمپ نے ڈاکٹر فاؤچی کو ملک کیلئے تباہی قرار دیدیا
20 اکتوبر ، 2020
امریکی صدر ڈونلڈ ٹرمپ نے عالمی وبا کورونا وائرس کی اصل صورتحال سے ملک کو خبردار کرنے والے ڈاکٹر فاؤچی کو ملک کے لیے تباہی قرار دے دیا۔
غیر ملکی خبر رساں ادارے کے مطابق امریکی صدر ڈونلڈ ٹرمپ امریکا کے سب سے بڑے ماہر امراض برائے متعدی امراض ڈاکٹر فاؤچی سے شدید ناراض ہو گئے ہیں۔
امریکی صدر ڈونلڈ ٹرمپ نے کورونا وائرس سے بچاؤ کی نصیحتیں کرنے والوں کو احمق قرار دیتے ہوئے کہا کہ عوام کو اب کورونا وائرس سے بچاؤ کی احتیاطی تدابیر اختیار کرنے میں کوئی دلچپسی نہیں، لوگ کورونا وائرس کا سن سن کر عاجز آ چکے ہیں۔
صدر ڈونلڈ ٹرمپ نے دوسرے اور آخری مباحثےکے منتظمین کو بائیڈن نواز قرار دے دیا اور کہا کہ آخری مباحثے کا طریقہ کار تبدیل کیا جانا چاہیے۔
خیال رہے کہ کورونا وائرس کو غیر سنجیدہ لینے والے امریکی صدر ڈونلڈ ٹرمپ گزشتہ دنوں خود کورونا وائرس کا شکار ہو گئے تھے۔
واضح رہے کہ امریکا میں عالمی وبا کورونا وائرس کے خطرناک وار جاری ہیں اور وبا سے اب تک 8 لاکھ سے زائد لوگ متاثر ہو چکے ہیں جب کہ امریکا میں کورونا سے ہونے والی ہلاکتوں کی تعداد سوا 2 لاکھ سے تجاوز کر چکی ہے۔
