25 اکتوبر ، 2020 
فیصل آباد میں دو بہنوں سے اغواء کے بعد مبینہ اجتماعی زیادتی
25 اکتوبر ، 2020
فیصل آباد میں دو بہنوں کو اغواء کرکے مبینہ طور پر اجتماعی زیادتی کا نشانہ بنا دیا گیا۔
پولیس نے لڑکیوں کے اغواء اور مبینہ زیادتی میں ملوث ہونے کے الزام میں 3 خواتین سمیت 15 افراد کے خلاف مقدمہ درج کرلیا۔
پولیس کے مطابق مقدمہ متاثرہ لڑکیوں کی والدہ کی درخواست پر درج کیا گیا جس میں الزام عائد کیا گیا کہ دونوں بیٹیوں کو 11 ستمبر کو گھر سے اغواء کیا گیا اور نشہ آور مشروب پلا کر اجتماعی زیادتی کا نشانہ بنا یا گیا۔
ایف آئی آر کے مطابق تین ملزمان نے بڑی بہن کو فیصل آباد کے ایک مکان میں رکھ کر جب کہ دو ملزمان نے چھوٹی بہن کو گوجرانوالا لے جا کر اجتماعی زیادتی کا نشانہ بنایا۔
لڑکیوں کی والدہ نے یہ الزام بھی لگایا کہ ان کی بالائی منزل پر رہائش پذیر فیملی نے دونوں بہنوں کے اغواء میں مدد کی۔
پولیس ترجمان منیب احسن کا کہنا ہے کہ لڑکیوں کا میڈیکل کروا لیا گیا ہے جب کہ فارنزک رپورٹ آنے پر کارروائی کو آگے بڑھایا جائے گا۔
پولیس ترجمان کا کہنا ہے کہ لڑکیاں 11 ستمبر کو اغوا ہوئیں اور اہل خانہ نے کارروائی کیلئے چند روز قبل ہی درخواست دی، واقعے کی تحقیقات جاری ہیں اور اب تک کسی ملزم کو گرفتار نہیں کیا جاسکا۔
