بائیڈن جیت کے بعد مسلم انتہاپسندوں کیلئے امریکا کے دروازے کھول دیں گے: ٹرمپ

امریکی صدر ڈونلڈ ٹرمپ نے مدمقابل ڈیموکریٹک امیدوار جو بائیڈن کو تنقید کا نشانہ بناتے ہوئے کہا ہے کہ جوبائیڈن جیت کے بعد مسلم انتہاپسندوں کے لیے امریکا کے دروازےکھول دیں گے۔

امریکی صدارتی انتخاب کی تاریخ قریب آتے ہی سیاسی گہما گہمی عروج پر پہنچ چکی ہے اور دونوں امیدوار ریلیوں کی صورت میں اپنے اپنے ووٹرز کی حمایت حاصل کرنے کی کوشش کررہے ہیں۔

امریکی صدارتی انتخاب میں ڈیموکریٹ امیدوار جو بائیڈن اور ری پبلکن امیدوار صدر ڈونلڈ ٹرمپ امریکی ریاست فلوریڈا میں موجود تھے جہاں دونوں نے الگ الگ انتخابی ریلیوں میں شرکت کی۔

امریکی ریاست فلوریڈا میں ریلی سے خطاب میں امریکی صدر ڈونلڈ ٹرمپ نے ایک بار پھر جوبائیڈن پر لفظی گولہ باری کی اور کہا کہ بائیڈن وہ سفری پابندیاں ختم کرنا چاہتے ہیں جو خطرناک ترین ممالک پرعائد کی ہیں اور وہ جیت کے بعد مسلم انتہاپسندوں کےلیے امریکا کے دروازےکھول دیں گے۔

امریکا کے صدارتی انتخاب سے پہلے جو بائیڈن کو ٹرمپ پر واضح برتری

امریکی اخبار نیویارک ٹائمز اور سائنا کالج کے سروے میں 50 فیصد ووٹرز نے بائیڈن جب کہ صرف 36 فیصد نے ٹرمپ کا چناؤ کیا

ڈونلڈ ٹرمپ نے خطاب کے دوران بائیڈن کو امریکی تاریخ کا بدترین صدارتی امیدوار قرار دیا جب کہ اپنی معاشی پالیسیوں کے دفاع کے ساتھ ساتھ اپنی تعریفیں بھی کیں۔

انہوں نے مزید کہا کہ بائیڈن کےمنصوبے پر عمل ہوا تو امریکا میں بھی ہولناک حملے ہوں گے لیکن میں فلوریڈا جیت کر مزید 4 برسوں کےلیے الیکشن جیت جاؤں گا۔

گرمی سے متعدد افراد بے ہوش

دوسری جانب امریکی صدر کی ریلی میں گرمی سے کئی افراد بے ہوش ہو گئے لیکن ڈونلڈ ٹرمپ نے خطاب جاری رکھا، پانی کے چھڑکاؤ سے چہرہ بھیگنے پرصدر آگ بگولہ ہو گئے اور چھڑکاؤکرنے والوں کو دشمن کہہ دیا۔

علاوہ ازیں فلوریڈا میں ہی ڈیموکریٹ امیدوار جو بائیڈن نے بھی انتخابی ریلی سے خطاب کیا اور انہوں نے امریکی صدر کی معاشی اور کورونا سے متعلق پالیسیوں کو تنقید کا نشانہ بنایا۔

ان کا کہنا تھا کہ اگر فلوریڈا میں ڈیموکریٹس جیت گئے تو ان کی انتخابات میں کامیابی یقینی ہے۔

خیال رہے کہ امریکی ریاست فلوریڈا امریکی صدارتی انتخاب میں نہایت اہم ہے اور الیکشن سے قبل کے پولز میں جوبائیڈن کو ٹرمپ پر برتری حاصل ہے۔