پرانے آئی فون کو نئے آئی فون میں تبدیل کرنیوالا منفرد کیس

01 نومبر ، 2020

گزشتہ ماہ ایپل کی جانب سے متعارف کرائے جانے والے نئے آئی فون 12 کی خریداری کہیں آپ کے بھی بجٹ سے باہر تو نہیں؟

اگرچہ نیو ماڈل فوبیا کا شکار افراد کے لیے نئے آئی فون کی اتنی زیادہ قیمت مشکل ثابت ہو سکتی ہے، لیکن پریشان نہ ہوں کیونکہ اب آپ تھوڑے سے پیسوں سے بھی باآسانی اپنے پرانے آئی فون کو نئے آئی فون 12 میں تبدیل کر سکتے ہیں۔

چینی میڈیا کے مطابق اب ایک ایسا آئی فون کیس مارکیٹ میں آیا ہے جو بنیادی طور پر آپ کے پرانے آئی فون کو ایپل کے نئے آئی فون 12 کے ریپلیکا (نقل) میں بدل سکتا ہے۔

یہ بھی پڑھیں

آئی فون 12 کے باضابطہ طور پر متعارف کروائے جانے کے چند دن بعد ہی یہ منفرد کیس چین کی مقامی الیکٹرانکس مارکیٹس میں فروخت کے لیے پیش کیا گیا ہے۔

اب صارفین آئی فون ایکس کے لیے کیس 450 یوآن (67 ڈالر) جب کہ آئی فون 11 کے لیے کیس 350 یوآن (52 ڈالر) میں حاصل کر سکتے ہیں۔

اگرچہ ان کیسوں کی قیمتیں عام فون کے کیس کے مقابلے میں کہیں زیادہ ہے لیکن اس کیس کے ذریعے آپ اپنے حلقہ احباب میں فوری توجہ باآسانی حاصل کرپائیں گے۔

دوسری جانب یہ کیس نا صرف آپ کے پرانے آئی فون کو عام کیس کی طرح تحفظ فراہم کرتا ہے بلکہ یہ آپ کے پرانے آئی فون کو باہر سے (externally) مکمل طور پر آئی فون 12 میں تبدیل کر دیتا ہے۔

بظاہر تبدیلی صرف جمالیاتی ثابت ہو سکتی ہے جیسا کہ ایپل کی دیگر مصنوعات کے ساتھ ہوتا ہے۔

اس ضمن میں چین کی سوشل میڈیا ویب سائٹ ’سینا ویبو‘ کے ایک صارف کا کہنا ہے کہ اس نئے کیس کا مطلب ہے کہ مجھے 2 سال تک اپنے پرانے آئی فون 11 کو اپ گریڈ نہیں کرنا پڑے گا۔