‘ہمارے ساتھ یہی ہورہا ہے‘، ٹرمپ نے سالوں پرانی الیکشن فراڈ کی خبر ٹوئٹر پر شیئر کردی

واشنگٹن: امریکی صدر ڈونلڈ ٹرمپ انتخابات میں شکست کے بعد مسلسل دھاندلی کے الزامات عائد کررہے ہیں جب کہ الیکشن حکام نے ان کے الزامات کی تردید کردی ہے۔

گزشتہ روز امریکا کے وفاقی الیکشن حکام نے ٹرمپ کے الزامات کی تردید کی اور انتخابات 2020 کو امریکی تاریخ کے محفوظ ترین الیکشن قرار دیا۔

امریکی الیکشن حکام نے ٹرمپ کا دھاندلی کا دعویٰ مسترد کردیا

امریکی وفاقی الیکشن حکام نے 2020 کے صدارتی انتخابات کو امریکی تاریخ کے سب سے محفوظ ترین الیکشن قرار دیا: برطانوی میڈیا

لیکن امریکی صدر ٹرمپ اب بھی بضد ہیں کہ انتخابات میں دھاندلی کی گئی اور ان کے ووٹ چرائے گئے ہیں۔

صدر ٹرمپ نے اس حوالے سے امریکا میں 1994 میں الیکشن فراڈ سے متعلق شائع خبر ٹوئٹر پر شیئر کی ہے۔

ساتھ ہی ٹرمپ نے لکھا کہ بالکل یہ ہی ہمارے ساتھ ہورہا ہے، امریکی جج نےبہت ہمت کی تھی۔

ٹرمپ نے جس خبر کو شیئر کیا اس کے مطابق 1994 میں امریکی ریاست پنسلوانیا میں جج نے فیصلے میں ڈیموکریٹک کامیاب امیدوار ولیم جی اسٹنسن کو شکست خوردہ قرار دیا تھا اور انہیں الیکشن فراڈ میں ملوث ٹھہرایا تھا۔

واضح رہے کہ امریکا کے صدارتی انتخابات میں ڈیموکریٹک امیدوار جوبائیڈن بھاری اکثریت سے کامیاب ہوئے ہیں۔