موسم سرما میں ذیابیطس کنٹرول کرنے والے ’’سپر فوڈز‘‘

عالمی ادارہ صحت کے مطابق دنیا بھر میں اس وقت ذیابیطس کے مریضوں کی تعداد 42 کروڑ سے زائد ہے جب کہ ہر سال 10 لاکھ سے زائد افراد اس مرض کے سبب موت کے منہ میں چلے جاتے ہیں۔

ذیابیطس کو کنٹرول کرنے کے لیے آپ کی روزمرہ غذا اہم کردار ادا کرتی ہے اور اگر بات کی جائے سردیوں کی غذاؤں کی تو کچھ خاص سبزیاں، پھل اور مسالہ جات ایسے بھی موجود ہیں جو ذیابیطس کو کنٹرول کرنے کے حوالے سے خاصے مقبول ہیں۔

موسم سرما میں وہ خاص غذائیں کونسی ہیں آئیے جانتے ہیں؟

امرود

ماہرین شوگر کے مریضوں کو بے وقت بلڈ شوگر اسپائکس سے محفوظ رہنے کے لیے کم گلیسیمک پر مشتمل غذاؤں کے استعمال کا مشورہ دیتے ہیں امرود کم گلیسیمک کے باعث شوگر کے مریضوں کے لیے بہترین پھل تصور کیا جاتا ہے۔

ساتھ ہی امرود ڈائٹری فائبر کا اہم ذخیرہ تصور کیا جاتا ہے، امرود میں موجود فائبر کی بڑی مقدار بلڈ شوگر کی بڑھتی سطح کو کنٹرول کرنے میں معاون ثابت ہوتی ہے۔

دار چینی

دارچینی ایک ایسا طاقتور مسالہ ہے جو بے شمار فوائد سے مالا مال ہے۔

ڈی کے پبلشرز کی جانب سے شائع کی گئی کتاب ’’ہیلنگ فوڈز ‘‘ میں دار چینی کے فوائد سے متعلق درج ہے کہ

دار چینی ایک زود ہضم مسالہ ہے جو خون میں گلوکوز اور ٹرائی گلیسرائیڈ کی سطح کو متوازن رکھتے ہوئےشوگر اور قلبی امراض جیسی بیماریوں کا خطرہ کم کرتا ہے۔ 

شوگر کے مریضوں کے لیے دارچینی کے استعمال کا سب سے بہترین طریقہ صبح کے وقت دارچینی والے پانی کا استعمال ہے۔

نارنگی

امریکن ڈائبٹیز ایسویسی ایشن کے مطابق ترش پھل مثلاً لیموں اور نارنگی ذیابیطس کے مریضوں کے لیے سپر فوڈز کے طور پر جانے جاتے ہیں، خاص طور پر اس وقت جب مریض خون میں شوگر کی سطح متوازن رکھنے کے لیے کسی ڈائٹ کا انتخاب کر رہے ہوں،کم گلیسیمک کے باعث شوگر کے مریض نارنگی سلاد، جوس کے طور پر بھی استعمال کرسکتے ہیں ۔

کیوی

وٹامن سی، فائبر، پوٹاشیم اور فائدہ مند اینٹی آکسیڈینٹ سے بھرپور پھل کیوی شوگر کے مریضوں کے لیے ایک بہترین غذا ہے۔

تحقیق سے بھی ثابت ہے کہ کیوی خون میں شوگر کی سطح کم کرنے میں مدد گار ثابت ہوتا ہے۔

گاجر

غذائیت سے بھرپور سبزی گاجر کو بھی شوگر کنٹرول کرنے والی غذا کے طور پر جانا جاتا ہے۔

گاجر میں موجود فائبر خون کے بہاؤ میں شوگر کی روانی کو سست کر دیتا ہے جب کہ گاجر میں پایا جانے والا نہایت کم مقدار گلیسیمک گاجر کو شوگر کے مریضوں کے لیے بہترین غذا بناتا ہے۔

لونگ

جرنل نیچرل میڈیسن میں شائع شدہ حالیہ تحقیق کے لیے لونگ کے جینیاتی ذیابیطس چوہوں پر اثرات کا مطالعہ کیا گیا، نتائج نے واضح کیا کہ لونگ ایکسٹریکٹ خون میں ناصرف انسولین بڑھانے میں مدد دیتا ہے بلکہ جسم میں انسولین کے ردعمل کو بھی بہتر بناتا ہے۔