22 نومبر ، 2020 
پشاور جلسے میں سیکیورٹی ایجنسی کیجانب سے تھریٹ الرٹ جاری ہوا ہے: کامران بنگش
22 نومبر ، 2020
وزیراعلیٰ خیبرپختونخوا محمود خان کے معاون خصوصی برائے اطلاعات کامران بنگش نے کہا ہے کہ پاکستان ڈیموکریٹک موومنٹ (پی ڈی ایم) کے پشاور جلسے کے موقع پر سیکیورٹی ایجنسی کی جانب سے تھریٹ الرٹ جاری ہوئی ہے۔
کامران بنگش کا کہنا تھا کہ پی ڈی ایم جلسے کے منتظمین کو تھریٹ الرٹ سے آگاہ کردیا گیا ہے جبکہ پشاور کے چاروں بڑے اسپتالوں میں ایمرجنسی نافذ کردی ہے۔
انہوں نے بتایا کہ ہم کسی کو ڈرانا نہیں چاہتے، حساس اداروں نے صبح ایک ٹیلی فون کال ٹریس کی ہے اور جلسے کی سیکیورٹی مزید بڑھا دی ہے، کسی بھی ناخوشگوار واقعے سے نمٹنے کیلئے قانون نافذ کرنے والے ادارے الرٹ ہیں۔
کامران بنگش کا کہنا تھا کہ کورونا اور سیکیورٹی تھریٹ سے آگاہ کردیا ہے جبکہ پی ڈی ایم کی جانب سے جلسے میں کورونا ضابطہ کار (ایس او پیز) پر عمل نہیں ہورہا ہے۔
خیال رہے کہ اپوزیشن اتحاد پی ڈی ایم کی جانب سے پشاور میں جلسہ عام کیا گیا جس سے مولانا فضل الرحمان اور بلاول بھٹو زرداری سمیت دیگر اعلیٰ قیادت نے خطاب کیا۔
