اسلام آباد ہائیکورٹ کے فیصلے کے بعد ای سی سی کا اجلاس اچانک ملتوی

اسلام آباد ہائیکورٹ کےفیصلے کے بعد وفاقی حکومت نے مشیر خزانہ کی زیر صدارت اقتصادی رابطہ کمیٹی کا  آج ہونے والا اجلاس اچانک ملتوی کر دیا۔

اعلیٰ سطح حکومتی ذرائع  نے جیو نیوز کے نمائندہ خصوصی آصف علی بھٹی کو  بتایا ہےکہ ای سی سی کا اہم اجلاس 9 دسمبر (آج )بلایا گیا تھا تاہم اسلام آباد ہائیکورٹ کے فیصلے کے بعد وفاقی حکومت نے اجلاس اچانک ملتوی کر دیا۔

مشیروں اور معاونین سے متعلق عدالتی فیصلے کے بعد حکومت نئی مشکل میں پھنس گئی

تقریباً تمام کابینہ کمیٹوں میں وزیراعظم کے مشیر یا معاونین خصوصی بطور چیئرمین یا رکن شامل ہیں مگر عدالتی فیصلے کے بعد یہ سب عملاً غیر فعال ہو چکے ہیں۔

ذرائع کا کہنا ہے کہ عدالتی فیصلے کے بعد مشیر خزانہ کے ای سی سی کی سربراہی کرنے پر قانونی سوالات اٹھنے کے سبب اجلاس اچانک ملتوی کیا گیا ہے۔

ذرائع کے مطابق ای سی سی کے اجلاس کے لیے 7 نکاتی ایجنڈا جاری کیا گیا تاہم رات گئے ای سی سی کا اجلاس بغیر کوئی وجہ بتائے ملتوی کر دیا گیا ہے۔

خیال رہے کہ اسلام آباد ہائیکورٹ مشیروں و معاونین خصوصی کی کابینہ کمیٹیوں کی سربراہی یا رکنیت کو غیر قانونی قرار دے چکی ہے۔