جنوبی افریقی کرکٹرز ابتدائی ٹریننگ کراچی جم خانہ کے گراؤنڈ میں کرینگے

پاکستان کرکٹ بورڈ (پی سی بی) اگلے ماہ جنوبی افریقی ٹیم کی پاکستان آمد کے موقع پر کراچی میں ٹیم کی ابتدائی ٹریننگ کیلئے ہوٹل سے متصل گراؤنڈ میں انتظامات کررہا ہے۔

جنوبی افریقی ٹیم 16 جنوری کو کراچی پہنچے گی جبکہ پہلا ٹیسٹ 26 جنوری سے ہوگا۔

جنوبی افریقا کی کرکٹ ٹیم 14 برس بعد پاکستان کا دورہ کرنے کیلئے تیار

دورے کے دوران جنوبی افریقا کی کرکٹ ٹیم دو ٹیسٹ اور تین ٹی ٹوئنٹی میچز کھیلے گی

پاکستان کرکٹ بورڈ کے قابل اعتماد ذرائع نے جیو نیوز کو بتایا کہ مہمان کرکٹرز آمد کے بعد ابتدائی 5 سے 7 روز آئسولیشن میں ہوں گے جس کیلئے ہوٹل میں انتظامات کیے گئے ہیں اور آئسولیشن کے دوران ٹریننگ کیلئے ٹیم ہوٹل کے برابر میں واقع کراچی جم خانہ کے کرکٹ گراؤنڈ میں انتظامات کیے جائیں گے۔

اس مقصد کیلئے کراچی جم خانہ کے گراؤنڈ کو بائیو سیکیور ببل کا حصہ بنایا جائے گا۔ آئسو لیشن مدت مکمل کرنے کے بعد مہمان کرکٹرز ٹیسٹ وینیو نیشنل اسٹیڈیم پر باضابطہ ٹریننگ شروع کرسکیں گے۔