13 دسمبر ، 2020 
لاہور میں پی ڈی ایم کا جلسہ، قافلوں کی مینار پاکستان آمد کا سلسلہ جاری
13 دسمبر ، 2020
لاہور میں حکومت مخالف اتحاد پاکستان ڈیمو کریٹک موومنٹ (پی ڈی ایم) کے جلسے کے سلسلے میں سیاسی رہنماؤں اور مختلف شہروں سے قافلوں کی آمد کا سلسلہ جاری ہے۔
مینار پاکستان گراؤنڈ میں کرسیاں لگا دی گئی ہیں اور سیاسی کارکنوں کا خون گرمانے کے لیے ساؤنڈ سسٹم بھی پہنچا دیے گئے ہیں جبکہ قائدین کے لیے 5 کنٹینرز پر مشتمل اسٹیج تیار کیا گیا ہے۔
مختلف شہروں سے قافلوں کی آمد جاری
جلسے میں شرکت کے لیے مختلف شہروں سے قافلوں کی آمد کا سلسلسہ جاری ہے جبکہ پی ڈی ایم قیادت بھی سابق اسپیکر قومی اسمبلی سردار ایاز صادق کے گھر ظہرانے کے بعد جلسہ گاہ پہنچے گی۔
جلسے کی سیکیورٹی کے فرائض انصارالاسلام کے سپرد
جلسے کی سیکیورٹی کے فرائض جمعیت علمائے اسلام کے کارکنوں کے سپرد کیے گئے ہیں۔
پی ڈی ایم جلسےکے لیے سیکیورٹی کی ذمہ داری جے یو آئی کی تنظیم انصار الاسلام کو دی گئی ہے جس کے 3000 رضاکار سیکیورٹی کے فرائض انجام دیں گے۔
رات گئے فضل الرحمان اور مریم نواز کا جلسہ گاہ کا دورہ
رات گئے پی ڈی ایم کے سربراہ مولانا فضل الرحمان اور مسلم لیگ ن کی نائب صدر مریم نواز نے علیحدہ علیحدہ جلسہ گاہ کا دورہ کیا اور انتظامات کا جائزہ لیا۔
پی ڈی ایم سربراہ مولانا فضل الرحمان کا کہنا تھا کہ سیاسی کارکنوں نے جلسے کی راہ میں حکومت کا ہر ہتھکنڈا ناکام بنا دیا ہے۔
ان کا مزید کہنا تھا کہ ہم امپائر کی انگلی پر نہیں عوام کی جدوجہد پر یقین رکھتے ہیں۔
میڈیا سےگفتگو میں مریم نواز کا کہنا تھا کہ کارکن تمام رکاؤٹیں توڑ کر جلسہ گاہ آئیں گے، حکمرانوں کو اب این آر او نہیں ملےگا۔
