28 دسمبر ، 2020 
لاہور میں لرزہ خیز واردات: 7 سالہ بچی کو قتل کرکے زیادتی کرنیوالے ملزمان گرفتار
28 دسمبر ، 2020
لاہور: پولیس نے 7 سالہ بچی کو قتل کرنے کے بعد زیادتی کا نشانہ بنانے والے ملزمان کو گرفتار کرلیا۔
جیونیوز کےمطابق لاہور میں کمسن بچی کو اغوا کے بعد قتل کرکے زیادتی کا نشانہ بنانے کی لرزہ خیز واردات ہوئی جہاں کل صبح 7 سالہ بچی عائشہ گھر کے پاس سے لاپتا ہوگئی تھی جس پر بچی کے والد نے تھانے میں اطلاع دی تو پولیس نے واقعے کا مقدمہ درج کرلیا۔
پولیس کے مطابق بچی کی لاش کل شام ہی ساڑھے 7 بجے کے قریب موہلنوال کے قریب تالاب سے ملی۔
پولیس کا کہنا ہےکہ واقعے کی تحقیقات پر محلے دار خاتون نے بتایا کہ اس نے بچی کو اس کے رشتے دار رضوان کے ساتھ جاتے دیکھا تھا جس پرپولیس نے خاتون کی نشاندہی پر کارروائی کرتے ہوئے ملزم رضوان کو گرفتار کرلیا۔
پولیس کے مطابق دورانِ تفتیش ملزم نے اعتراف کیا کہ وہ چیز دلانے کے بہانے بچی کو بہلاکر ساتھ لے گیا، اس نے پہلے بچی کو قتل کیا اس کے بعد لاش کی بے حرمتی کرتے ہوئے زیادتی کا نشانہ بنایا جب کہ اس کا ساتھی ملزم اللہ دتہ اس سارے عمل کی نگرانی کرتا رہا اور پھر بعد اس نے بھی بچی سے زیادتی کی۔
پولیس کاکہنا ہےکہ ملزم رضوان کے ساتھ اللہ دتہ کو بھی گرفتار کرکے دونوں کے خلاف مقدمہ درج کرلیا گیا ہے جب کہ ملزمان سے مزید تفتیش کی جارہی ہے۔
