مائیکرو فون اور ائیر بڈز والا دنیا کا پہلا ماسک پیش

کورونا وائرس کے پھیلاؤ کو روکنے کے لیے ماسک ہی ایک واحد چیز ہے اور اب یہ ہماری زندگیوں کا ایک لازمی حصہ بن چکا ہے۔

متعدد ٹیکنالوجی کمپنیوں کی جانب ایک عام ماسک میں جدت لائی جا چکی ہے لیکن اب دنیا میں پہلی بار ایسا ماسک پیش کیا گیا جس کی مدد سے آپ موبائل فون باہر نکالے بغیر ہی کال پر بات کر سکیں گے۔

حال ہی میں ٹیکنالوجی کے سب سے بڑے میلے کنزیومر الیکٹرانک شو (سی ای ایس) 2021 میں بینا ٹون نامی کمپنی کی جانب سے مائیکرو فون اور ائیربڈز والا دنیا کا پہلا ماسک پیش کیا گیا ہے۔

جدید ٹیکنالوجی سے لیس اس ماسک کا نام 'ماسک فون' ہے جسے با آسانی دھویا بھی جا سکتا ہے اور اس میں این 95 فلٹرز بھی لگے ہوئے ہیں جب کہ اس میں وائر لیس ہیڈ سیٹ بھی موجود ہیں۔

کمپنی کا دعویٰ ہے کہ اس ماسک کی مدد سے لوگ باہر چلتے پھرتے یا کام پر اب کالز پر بھی بات کر سکتے ہیں اور یہ فرنٹ لائن ورکرز کے لیے کافی مددگار سمجھا جا رہا ہے۔

اس ماسک فون کے ائیرلوپس میں وائرنگ کی گئی ہے جسے ہلکی پھلکی بارش میں پہنا جا سکتا ہے۔

صارفین کو اگر یہ ماسک دھونا ہوگا تو انہیں اس میں سے پہلے ائیر بڈز کو نکالنا ہو گا اس کے بعد وہ اسے آرام سے دھویا جا سکتا ہے۔

اس ماسک میں لگی بیٹری کی لائف 12 گھنٹے ہے اور اس کی قیمت 50 ڈالر ہے جب کہ یہ دو سائز (اسمال میڈیم) اور (میڈیم لارج) میں میسر ہو گا۔