کنگنا رناوت نے اداکارہ ہونے کی سب سے بُری بات بتا دی

بالی وڈ میں اقرباپروری کے خلاف آواز اٹھانے والی معروف اداکارہ کنگنا رناوت نے حال ہی میں بتایا کہ ایک اداکارہ ہونے کی سب سے بُری بات کیا ہے۔

سوشل میڈیا پر فعال رہنے والی کنگنا رناوت نے اپنے ٹوئٹر اکاؤنٹ پر ایک ٹوئٹ کی لیکن اس بار انہوں نے اقرباپروری کے حوالے سے بات نہیں کی۔

اداکارہ کنگنا نے کہا کہ 'اقرباپروری اور مووی مافیا کے علاوہ ایک اداکارہ ہونے کی سب سے بُری بات رات کی شفٹس ہوتی ہیں'۔

کنگنا نے وضاحت کرتے ہوئے بتایا کہ 'جب سورج طلوع ہوتا ہے تو ہم اس وقت سونے لیٹتے ہیں، ایسے میں آپ کے جسم اور کھانے کے معمولات متاثر ہوتے ہیں'۔

ان کا مزید کہنا تھا کہ 'پہلی چند راتوں میں مجھے بھوک محسوس نہیں ہو رہی تھی، اب میں انتظار کر رہی ہوں کہ کب میرا جسم اس کا عادی ہو گا'۔ 

خیال رہے کہ اداکارہ کنگنا رنوت ان دنوں بھوپال میں ہیں جہاں وہ اپنے آنے والی نئی ایکشن فلم 'دھکڑ' کی شوٹنگ میں مصروف ہیں، کنگنا اس فلم میں ایک جاسوس کا کردار ادا کرتے نظر آئیں گی۔