بھارت میں کورونا ویکسین لگوانے والا اسپتال کا وارڈ بوائے انتقال کرگیا

بھارت میں کورونا وائرس کی ویکسین لگوانے والا اسپتال کا ملازم انتقال کرگیا۔

بھارتی میڈیا کےمطابق یہ واقعہ ریاست اترپردیش میں پیش آیا جہاں مراد آباد میں کورونا کی ویکسین لگوانے والا اسپتال کا 46 سالہ ملازم اتوار کی شام انتقال کرگیا۔

دنیا کی سب سے بڑی کورونا ویکسینیشن مہم بھارت میں شروع

ویکسینیشن کے پہلے روز بھارت بھر میں ایک لاکھ 91 ہزار سے زائد ڈوز دی گئیں: بھارتی وزارت صحت

بھارتی میڈیا کا بتانا ہےکہ مرنے والا شخص اسپتال میں وارڈ بوائے تھا جس نے 24 گھنٹے قبل کورونا وائرس کی ویکسین لگوائی تھی جس کی تصدیق مراد آباد کے چیف میڈیکل آفیسر کی جانب سے بھی کی گئی ہے۔

بھارتی میڈیا کے مطابق چیف میڈیکل آفیسر کا کہنا ہےکہ مراد آباد اسپتال کے ملازم مہیپال سنگھ کی موت دل کا دورہ پڑنے سے ہوئی ہے جس کی تصدیق پوسٹ مارٹم رپورٹ سے ہوئی۔

میڈیا رپورٹس کے مطابق بھارت میں جمعے سے شروع ہونے والی دنیا کی سب سے بڑی کورونا ویکسی نیشن مہم میں ایک روز کے بعد ایک لاکھ 91 ہزار ہیلتھ کیئر اور فرنٹ لائن ورکرز کو ویکسین دی جاچکی ہے۔

بھارتی دارالحکومت دہلی اور ریاست راجستھان سے اب تک کورونا ویکسین کے معمولی منفی اثرات رپورٹ ہوئے ہیں جہاں دہلی میں 51 ہیلتھ ورکر میں معمولی منفی اثرات دیکھنے میں آئے۔