براڈ شیٹ معاملہ: کابینہ نےعظمت سعید کی سربراہی میں انکوائری کمیشن کی منظوری دیدی
26 جنوری ، 2021
وفاقی کابینہ نے براڈشیٹ کے معاملے پر انکوائری کمیشن بنانے کی منظوری دے دی۔
وزیراعظم عمران خان کی زیر صدارت وفاقی کابینہ کا اجلاس اسلام آباد میں ہوا جس میں براڈشیٹ کے معاملے پر انکوائری کمیشن بنانے کی منظوری دی گئی۔
ذرائع کے مطابق براڈ شیٹ معاملے پر انکوائری کمیشن جسٹس (ر) عظمت سعید پر مشتمل ہوگا، ایک رکنی کمیشن ،کمیشن آف انکوائری ایکٹ کے تحت کارروائی کرے گا۔
کابینہ اجلاس کے بعد میڈیا کو بریفنگ میں وفاقی وزیر اطلاعات شبلی فراز نے بتایا کہ تحقیقاتی کمیشن کو براڈ شیٹ کے معاملے پر حاصل ہونے والی معلومات 45 دن میں پیش کرنے کی ہدایت کی گئی ہے۔
وزیراطلاعات کا کہنا تھا کہ وزیراعظم عمران خان کسی بھی دباؤ میں آئے بغیر تمام بدعنوان عناصر کا احتساب کریں گے۔
