راج کپور کے آبائی گھر کے مالک کا کم قیمت پر حکومت کو گھر دینے سے انکار

بھارتی فلموں کے اداکار راج کپور کے آبائی گھر کے مالک نے ڈیڑھ کروڑ روپے میں مکان فروخت کرنے سے انکار کرتے ہوئے  حکومت سے 2  ارب روپے کا مطالبہ کیا ہے۔

جیونیوز  کے مطابق خیبر پختونخوا حکومت نے دلیپ کمار اور راج کپور کے پشاور میں واقع آبائی گھروں کو خرید کر میوزیم میں تبدیل کرنے کا فیصلہ کیا تھا، حکومت نے راج کپور کے مکان کی مجموعی قیمت ایک کروڑ  50 لاکھ 989 روپے مقرر کی ہے اور ڈپٹی کمشنر کو دونوں مکانات کی خریداری کے لیے 24ملین روپے کی رقم جاری کر دی گئی ہے۔

 راج کپور کے مالک کے مکان حاجی علی قادر نے مکان کی قیمت ڈیڑھ کروڑ مقررکرنے کا فیصلہ مسترد کرتے ہوئے کہا کہ ڈھکی نعل بندی میں ڈیڑھ کروڑ میں نصف مرلہ زمین نہیں ملتی اور حکومت ہمیں 6 مرلے کے مکان کی ڈیڑھ کروڑ روپے قیمت دے رہی ہے، قدیم اورتاریخی گھر کے حوالے سے حکومتی رویہ مذاق ہے۔

دوسری جانب ڈائریکٹر آثار قدیمہ اینڈ میوزیم عبدالصمد نےکہا کہ حکومت نے ڈی سی ریٹ کے مطابق ہی مکان کی قیمت کا تعین کیا ہے، حکومت اس ریٹ سے زائد قیمت ادا نہیں کرسکتی،مالک کو قیمت پر اعتراض ہے تو وہ ڈپٹی کمشنر کو درخواست جمع کراسکتا ہے۔