دل کی تکلیف کی شکایت پر حلیم عادل جیل سے اسپتال منتقل
21 فروری ، 2021
پاکستان تحریک انصاف (پی ٹی آئی) کے رہنما اور سندھ اسمبلی میں اپوزیشن لیڈر حلیم عادل شیخ کو دل کی تکلیف کی شکایت پر اسپتال منتقل کردیا گیا۔
حلیم عادل شیخ کی جانب سے جیل سپرنٹنڈنٹ کو اسپتال لے جانے کی درخواست کی گئی تھی جس پر انہیں ایمبولینس میں قومی ادارہ برائے امراض قلب( این آئی سی وی ڈی) منتقل کردیا گیا۔
درخواست میں حلیم عادل شیخ کا کہنا تھا کہ وہ پہلے سے بلڈ پریشر اور انجائنا کے مریض ہیں اور این آئی سی وی ڈی میں ان کا علاج ہوتا رہا ہے، وہ سینے میں تکلیف محسوس کررہے ہیں۔
اسپتال سے جیونیوز کے نمائندے سے فون پر گفتگو کرتے ہوئے انھوں نے جیل میں تشدد کا الزام عائدکرتے ہوئےکہا کہ جیل میں پیپلز پارٹی کے قید گینگ وار کے 50 سے زائد افراد نے ان پر تشدد کیا۔
خیال رہےکہ حلیم عادل شیخ کو گزشتہ روز عدالتی ریمانڈ پر جیل منتقل کیا گیا تھا، ان پر کراچی میں ضمنی انتخابات والے روز پولنگ اسٹیشن پر اسلحے سمیت جانے اور ہوائی فائرنگ کے الزامات ہیں۔
