حلیم عادل شیخ ایک بار پھر الزام تراشی کر رہے ہیں، صوبائی مشیر جیل خانہ جات
22 فروری ، 2021
وزیراعلیٰ سندھ کے مشیر برائے جیل خانہ جات اعجاز جاکھرانی نے سندھ اسمبلی میں اپوزیشن لیڈر حلیم عادل شیخ کی جانب سے جیل میں قیدیوں کی جانب سے تشدد کے الزامات کی تردید کی ہے۔
جیو نیوز سے فون پر گفتگو کرتے ہوئے اعجاز جاکھرانی کا کہنا تھا کہ حلیم عادل شیخ ایک بار پھر الزام تراشی کر رہے ہیں، حلیم عادل کو جیل کے اندر لے جاتے ہوئے چند قیدیوں نے نعرے بازی کی جس پر جیل انتظامیہ نے صورت حال بھانپ کر انہیں واپس سیکیورٹی میں اندر کیا۔
اعجاز جاکھرانی کے مطابق حلیم عادل کو سینٹرل جیل کے خصوصی سیل میں رکھا تھا، ویڈیو میں دیکھا جاسکتا ہے کہ صورت حال 20 سیکنڈ میں نارمل ہوگئی۔
خیال رہے کہ حلیم عادل شیخ کے ترجمان نے الزام عائد کیا ہے کہ جیل میں مبینہ تشدد سے حلیم عادل کی ٹانگ اورجسم کے دیگراعضاپر چوٹیں آئیں ہیں۔
وہیں وفاقی وزیرداخلہ شیخ رشید نے حلیم عادل کے الزام کا نوٹس لیتے ہوئے چیف سیکرٹری سندھ سے رپورٹ طلب کرلی ہے۔
دوسری جانب جیل انتظامیہ نے سی سی ٹی وی کیمرے کی ویڈیو اور تصاویر بھی جاری کردی ہیں۔
