12 مارچ ، 2021 
سینیٹ: مصدق ملک پولنگ بوتھ سے نکلنے والی خفیہ ڈیوائس بھی سامنے لے آئے
12 مارچ ، 2021
مسلم لیگ ن کے رہنما سینیٹر مصدق ملک چیئرمین اور ڈپٹی چیئرمین سینیٹ کے لیے ہونے والے انتخابات سے قبل پولنگ بوتھ سے نکلنے والی خفیہ ڈیوائس بھی سامنے لے آئے۔
سینیٹر مصدق ملک کا پولنگ بوتھ کے مختلف حصے دکھاتے ہوئے کہنا تھا، بوتھ کا پیکج کل سوا ایک بجے کے قریب الیکشن کمیشن کی طرف سے آیا تھا۔
سامنے آنے والی ویڈیو میں دیکھا جا سکتا ہے کہ رہنما مسلم لیگ ن سینیٹ کے عملے سے پوچھ رہے ہیں کہ بوتھ کتنے بجے آیا تھا جس پر وہ بتاتے ہیں کہ کل سوا ایک بجے کے قریب اس بوتھ کو فکس کیا گیا تھا جس کا باقاعدہ لیٹر بھی موجود ہے۔
مصدق ملک کے پوچھنے پر سینیٹ عملے کے اہلکار کا بتانا تھا کہ جب اس بوتھ کو سیٹ کیا گیا تو اس میں کوئی چیز نہیں لگی ہوئی تھی۔
مصدق ملک نے بوتھ کے اندر سے نکلنے والی ڈیوائس دکھاتے ہوئے بتایا کہ یہ ڈیوائس ٹرانسمیشن ہے، مائیک ہے یا ٹیپ ریکارڈر ہے، یہ میں نہیں جانتا۔
خیال رہے کہ مسلم لیگ ن کے سینیٹر مصدق ملک اور پیپلز پارٹی کے سینیٹر مصطفیٰ نواز کھوکھر کی جانب سے پولنگ بوتھ میں خفیہ کیمرے لگے ہونے کی نشاندہی کی گئی تھی۔
