12 مارچ ، 2021 
’خدارا میری جان چھوڑدو‘، جگن ناقدین پر برس پڑیں
12 مارچ ، 2021
اداکارہ و میزبان جگن کاظم نے حال ہی میں برطانوی میڈیا سے گفتگو کے دوران بچے کی پیدائش کے بعد بڑھنے والے وزن اور جسامت پر کی جانے والی تنقید سے متعلق گفتگو کی۔
جگن کاظم نے کہاکہ بچے کی پیدائش کے بعد میں خطرناک حد تک پوسٹ پارٹم ڈپریشن کا شکار ہوگئی تھی اور اس ڈپریشن کے دوران جب بار با ر موٹاپے کا احساس دلایا جاتا تو میرا دل کرتا تھا کہ زمین پھٹے اور میں اس میں گر جاؤں۔
انہوں نے کہا کہ میں آج کل کاندھے جھکا کر چلتی ہوں تاکہ کسی کی جسامت پر نظر نہ پڑے۔
اداکارہ نے دوران گفتگو ناقدین سے مخاطب ہوتے ہوئے کہا کہ خدارا میری جان چھوڑدو، میرا وزن کم ہورہا ہے یا نہیں یا ہوجائے گا، وزن کم نہیں ہوا تو نہیں ہوا۔
جگن کاظم کا کہنا تھا کہ پہلے بچے کی پیدائش کے بعد میرے وزن میں 30 کلو کا اضافہ ہوگیا تھا، جسامت اور وزن سے متعلق تنقید سن کر خاصی پریشان ہوگئی تھی، تنہائی میں روتی تھی اور سوچتی تھی کہ کہیں بچہ پیدا کرکے کوئی غلطی تو نہیں کی۔
خیال رہے کہ جگن کاظم پہلی شادی ناکام ہونے کے بعد 27 جون 2013 کو رشتہ ازدواج میں منسلک ہوئیں، ان کے دو بیٹے اور ایک بیٹی ہے۔
