انٹرٹینمنٹ

حنا کو شادی کیلئے کیسے پروپوز کیا؟ آغا علی نے سب بتادیا

23 مئی ، 2021

اداکار آغا علی نے اپنی اہلیہ اداکارہ حنا الطاف کو شادی کیلئے پروپوز کرنے کی کہانی بیان کردی۔

آغا علی نے حال ہی میں اہلیہ حنا الطاف کے ساتھ نجی ٹی وی چینل کے ایک پروگرام میں شرکت کی جہاں انہوں نے شادی سے قبل ملاقات اور پھر دوستی محبت میں بدلنے کی کہانی مداحوں کو بتائی۔

آغا علی کا کہنا تھا کہ ہماری ملاقات ڈرامہ سیریل دلِ گمشدہ کے سیٹ پر ہوئی، شروعات میں ہم دونوں ایک دوسرے سے بالکل بات نہیں کرتے تھے، آہستہ آہستہ بات چیت شروع ہوئی۔

یہ بھی پڑھیں

انہوں نے بتایا کہ پھر ہماری دوستی ہوئی جس کے بعد پتہ چلا کہ دونوں کی ماضی کی زندگی میں کافی حد تک مماثلت تھی، پھر ایک دن گفتگو کے دوران حنا نے مجھے بتایا کہ وہ اپنی زندگی میں شادی کر کے سیٹل ہونا چاہتی ہیں۔

اداکار کا مزید کہنا تھا کہ میری ماں جی حنا کو جانتی تھیں اور میرے دل کا حال بھی انہیں پتا تھا کہ میں اسے پسند کرتا ہوں تو انہوں نے مجھے کہا کہ بیٹا پھر تمہیں اس سے شادی کرلینی چاہیے۔

اس دوران حنا الطاف کا کہنا تھا کہ میرا تعلق ساس سے بالکل دوستوں والا ہے۔

گفتگو کے دوران اداکار آغا علی نے بتایا کہ ہمارا پروپوزل بھی کافی سادگی سے تھا، میں نے حنا سے فون پر پوچھا کہ تم زندگی میں سیٹل ہونا چاہتی ہو، میں بھی ایسا ہی چاہتا ہوں تو چلو شادی کرلیتے ہیں۔

دوسری جانب آغا کی تعریف کرتے ہوئے حنا نے بتایا کہ یہ بہت وفادار ہیں، ساتھ ہی اپنی فیملی کا بے حد خیال رکھتے ہیں اور مجھے ان کی یہی خصوصیت پسند ہیں۔

یاد رہے کہ آغا علی اور حنا الطاف کی شادی گزشتہ برس لاک ڈاون کے دوران 22 مئی کو ہوئی تھی۔