کورونا مریضوں سے اسپتال بھرچکے، کراچی میں مکمل لاک ڈاؤن لگایا جائے، پی ایم اے کا مطالبہ

پاکستان میڈیکل ایسوسی ایشن (پی ایم اے) کے جنرل سیکرٹری ڈاکٹر قیصر سجاد نے کراچی میں مکمل لاک ڈاؤن کا مطالبہ کردیا۔

جیونیوز سے گفتگو میں  ڈاکٹر قیصر سجاد کا کہنا تھاکہ حکومتی اعدادوشمار کے مطابق کوروناکیسزکی شرح 30فیصد ہے لیکن کورونا ٹیسٹ نہ کرانے والوں کو شامل کریں تو شرح 40 فیصد بنتی ہے۔

کراچی میں کورونا مزید بڑھ گیا

گزشتہ 24 گھنٹوں میں مثبت کیسز کی شرح 26 فیصد سے بڑھ گئی

انہوں نے کہا کہ کوروناشرح میں اضافہ ہوتا ہے تو لاک ڈاؤن کے سوا کوئی چارہ نہیں اور کوروناکیس بڑھنے پرکراچی میں 15دن کا لاک ڈاؤن لگادیا جائے۔

ان کا کہنا تھاکہ اسپتالوں میں جگہ بھر گئی ہے، اب گنجائش نہیں ہے، تمام لوگ ایس او پیز پر عمل کریں، حکومت کو سخت اقدامات کرنا ہوں گے تاکہ لوگوں کی جانوں کی حفاظت ہو سکے۔

خیال رہے کہ کراچی میں کورونا کی صورتحال بگڑتی جارہی ہے اور اسپتالوں میں گنجائش بھی ختم ہوتی جارہی ہے۔

محکمہ صحت سندھ کے مطابق گزشتہ 24 گھنٹوں میں کراچی میں مثبت کیسز کی شرح 26 فیصد سے بڑھ گئی ہے۔