30 جولائی ، 2021
دیگر کئی مسلمان کھلاڑیوں کے برعکس ٹوکیو اولمپکس گیمز میں سعودی جوڈوکا ثانی القحطانی نے نہ صرف اسرائیلی کھلاڑی سے مقابلہ کیا بلکہ شکست کے بعد دونوں کھلاڑیوں نے اظہار یکجہتی بھی کیا۔
یاد رہے کہ ٹوکیو اولمپکس میں مردوں کے 73 کلوگرام کیٹگری میں دو مسلمان کھلاڑیوں نے اسرائیلی ایتھلیٹس کے ساتھ میچ کا بائیکاٹ کر دیا تھا جس کے بعد سعودی عرب اور اسرائیل کے کھلاڑیوں کے اس مقابلے پر سب کی نظریں تھیں۔
خواتین کی 78 کلو گرام کی کیٹگری میں سعودی جوڈوکا ثانی القحطانی نے اسرائیلی جوڈوکا راز ہرشکو سے مقابلہ کیا جہاں انہیں شکست ہوئی تاہم دیگر دو مسلمان کھلاڑیوں کے برعکس دونوں ایتھلیٹس نے نہ صرف مصافحہ کیا بلکہ فضا میں ہاتھ بلند کرکے اظہار یکجہتی بھی کیا۔
الجزائر سے تعلق رکھنے والے فتحی نورین پہلے کھلاڑی تھے جنہوں نے ٹوکیو اولپمکس میں اسرائیلی حریف سے مقابلے کا بائیکاٹ کیا جس پر انہیں ایونٹ سے باہر کر دیا گیا تھا۔
اس حوالے سے غیر ملکی میڈیا سے گفتگو کرتے ہوئے نورین کا کہنا تھا کہ ہم اولمپکس تک پہنچنے کے لیے بے حد محنت کرتے ہیں لیکن فلسطین کے مسائل اس سب سے کہیں زیادہ اہم ہیں۔
بعد ازاں سوڈان سے تعلق رکھنے والے محمد عبدالرسول کو 73 کلو گرام ڈویژن میں مقابلہ کرنا تھا لیکن انہوں نے میچ کے 32 ویں راؤنڈ میں اسرائیلی حریف سے مقابلہ کرنے سے انکار کردیا تھا۔