بارسلونا کو چھوڑنے کے بعد میسی کون سے فٹبال کلب میں شمولیت اختیار کریں گے؟

ارجنٹائن کے اسٹار فٹبالر لیونل میسی نے مشہور ہسپانوی فٹبال کلب بارسلونا کو خیرباد کہہ دیا جبکہ اس حوالے سے الوداعی پریس کانفرنس بھی کی گئی۔

لائنل میسی اور بارسلونا کی راہیں 21 سال بعد جدا ہوگئیں

میسی اور بارسلونا کے درمیان معاہدہ گزشتہ ماہ جولائی میں ختم ہوگیا تھا اور یہی خیال کیا جارہا تھا کہ اسٹار فٹبالر کلب سے مزید معاہدہ کرلیں گے

پریس کانفرنس کے دوران میسی بارسلونا کو الوداع کہنے پر رو پڑے، اس پر میسی نے میڈیا نمائندے سے ٹشو پیپر لے کر آنسو صاف کیے۔

اس کے دوران پریس کانفرنس میں شریک افراد نے اسٹار فٹبالر کو کھڑے ہوکر داد پیش کی اور ہال تالیوں سے گونج اٹھا۔

دوسری جانب میسی کا بارسلونا کو خیرباد کہنے کے بعد قطری ملکیت کے فرانسیسی فٹبال کلب پیرس سینٹ جرمین (پی ایس جی) میں شمولیت کا امکان ہے۔

رپورٹس کے مطابق اسٹار فٹبالر نے بھی پی ایس جی کلب میں شمولیت کا اشارہ دیا ہے۔

رپورٹس میں بتایا گیا ہے کہ کلب کی جانب سے میسی کو سالانہ 25 ملین پاؤنڈز رقم کی پیشکش کی گئی ہے تاہم کلب میں شمولیت کے حوالے سے حتمی معاہدہ جلد ہونے کا امکان ہے۔

یاد رہے کہ کچھ روز قبل ارجنٹائن کے فٹبال اسٹار لیونل میسی نے مشہور ہسپانوی فٹبال کلب بارسلونا کو 21 سال بعد خیر باد کہہ دیا تھا۔