پی سی بی نے قومی ٹیم کیلئے غیر ملکی ہیڈ کوچ لانے کا منصوبہ بنالیا

لاہور: پاکستان کرکٹ بورڈ نئے کوچز کی تلاش کے لیے جلد کارروائی کا آغاز کرے گا۔

مصباح الحق اور وقار یونس کے کوچنگ کے عہدوں سے دستبردار ہونے کے بعد عارضی طور پر ثقلین مشتاق اور عبدالرزاق کو ذمہ داریاں سونپی گئی ہیں۔

ذرائع کا کہنا ہےکہ ہیڈ کوچ اور بولنگ کوچ کی تلاش کے لیے پی سی بی جلد عمل کا آغاز کرے گا۔

پی سی بی ذرائع کے مطابق کوچز کی تلاش کے لیے اشتہار دیا جائے گا اور تمام قانونی تقاضوں کو پورا کرتے ہوئے آئی سی سی ٹی ٹوئنٹی ورلڈکپ سے قبل کوچزکی تقرری کا عمل پورا کرنے کا وقت ہے۔

ذرائع کے مطابق پی سی بی نے غیر ملکی ہیڈ کوچ کی تقرری کا منصوبہ بنایا ہوا ہے اور اس کے لیے انگلینڈ کے پیٹرمورز کا نام گردش کررہا ہے جب کہ قوی امکان یہی ہے کہ پیٹر مورزہی پاکستان ٹیم کے نئے کوچ ہو سکتے ہیں۔