13 ستمبر ، 2021 
پاکستان
ہراسانی کا الزام لگانے والی خاتون نے ایم پی اے خرم لغاری کو معاف کردیا
13 ستمبر ، 2021
لاہور کی سیشن عدالت نے خاتون کو ہراساں کرنے اور بلیک میلنگ کے مقدمے میں پاکستان تحریک انصاف (پی ٹی آئی) جہانگیر ترین گروپ کے رکن پنجاب اسمبلی خرم لغاری کی عبوری ضمانت کی توثیق کر دی۔
ایڈیشنل سیشن جج نے خرم لغاری کی درخواست ضمانت پر سماعت کی۔ مدعی مقدمہ نے خرم لغاری کو معاف کرنے سے متعلق عدالت میں بیان دیا۔
مدعیہ نے بیان میں کہا کہ صلح ہو گئی ہے، خرم لغاری کی ضمانت پر کوئی اعتراض نہیں اور کیس کی مزید پیروی نہیں کرنا چاہتی۔
خیال رہے کہ گزشتہ دنوں مدعیہ نے ہراساں اور بلیک میلنگ کا الزام لگاتے ہوئے خرم لغاری کے خلاف مقدمہ درج کرایا تھا۔
خرم لغاری نے گرفتاری سے بچنے کیلئے عبوری ضمانت کی درخواست دائر کی تھی۔
