03 اکتوبر ، 2021 
ایم کیو ایم کا عمر شریف کی میت 48 گھنٹوں میں وطن لانے کا مطالبہ
03 اکتوبر ، 2021
ایم کیو ایم پاکستان نے گزشتہ روز جرمنی کے اسپتال میں انتقال کر جانے والے لیجنڈ اداکار اور کامیڈین عمر شریف کے جسد خاکی کو 48 گھنٹوں میں وطن واپس لانے کے لیے انتظامات کرنے کا مطالبہ کیا ہے۔
ایم کیو ایم پاکستان کی جانب سے جاری اعلامیے میں کہا گیا ہے کہ وفاقی وزیر امین الحق نے وزیر خارجہ شاہ محمود قریشی سے ٹیلیفونک رابطہ کیا اور عمر شریف کے جسد خاکی کو جلد از جلد وطن واپس لانے پر مشاورت کی۔
اعلامیے کے مطابق وزیر خارجہ شاہ محمود قریشی نے عمر شریف کے جسد خاکی کو جلد وطن واپس لانے کے اقدامات سے آگاہ کیا۔
ایم کیو ایم پاکستان کے جاری کردہ اعلامیے کے مطابق امین الحق نے جرمنی میں پاکستانی سفیر ڈاکٹر محمد فیصل سے بھی ٹیلیفونک رابطہ کیا جبکہ وزیر خارجہ شاہ محمود قریشی نے بھی ڈاکٹر محمد فیصل کو عمر شریف کی فیملی سے ہر ممکن تعاون کی ہدایت کی۔
وفاقی وزیر امین الحق کراچی میں عمر شریف کے گھر بھی گئے اور اہلخانہ سے تعزیت کی اور اس موقع پر ان کا کہنا تھا عمر شریف اس قوم کے لیجنڈ ہیں، وہ صرف پاکستان کے نہیں ایشیا کے بڑے فنکار تھے۔
ان کا کہنا تھا ایم کیو ایم نے عمر شریف کے انتقال پر سوگ کا اعلان کیا ہے اور تمام ایونٹ ملتوی کر دیے ہیں۔
امین الحق نے 48 گھنٹوں میں عمر شریف کی میت پاکستان لانے کے انتظامات کرنے کا مطالبہ کرتے ہوئے کہا کہ وزیر اعظم سے درخواست کریں گے کہ سرکاری سطح پر عمر شریف کی نماز جنازہ ادا کی جائے۔
مزید خبریں :
سندھ حکومت کا سول کورٹ رولز میں ترمیم کا فیصلہ
45 منٹ پہلے
بیلاروس کے صدر 3 روزہ دورے پر اسلام آباد پہنچ گئے
5 گھنٹے پہلے
