جام کمال سے ناراض ظہوربلیدی بلوچستان عوامی پارٹی کے قائم مقام صدر مقرر
12 اکتوبر ، 2021
وزیراعلیٰ بلوچستان جام کمال سے ناراض رہنما ظہور احمد بلیدی کو بلوچستان عوامی پارٹی (باپ) کا قائم مقام صدر مقرر کردیا گیا۔
باپ کے ذرائع کے مطابق پارٹی کے نائب صدر میر ظہور احمد بلیدی کو بلوچستان عوامی پارٹی کا قائم مقام صدر مقرر کردیاگیا ہے۔
ذرائع نے بتایا کہ قائم مقام صدر بنانے کا فیصلہ پارٹی کے بانی رہنما اور سینیٹر سعید احمد ہاشمی کی زیر صدارت اجلاس میں کیاگیا۔
دوسری جانب بی اے پی کے سیکرٹری جنرل و سینیٹر منظوراحمد کاکڑ نے الیکشن کمیشن آف پاکستان کو بھی پارٹی کےفیصلےسےآگاہ کردیاہے۔
خیال رہے کہ میر ظہور احمد بلیدی چند روز قبل صوبائی وزیر خزانہ کی حیثیت سے مستعفی ہوگئے تھے اور وہ پارٹی کے ناراض اراکین اسمبلی میں شامل ہیں۔
