08 نومبر ، 2021 
نسلہ ٹاور گرانےکیلئےکمپنی کا انتخاب کرلیا گیا
08 نومبر ، 2021
کراچی میں شارع فیصل پر واقع کثیر منزلہ رہائشی عمارت نسلہ ٹاورکو سپریم کورٹ کی ہدایت پر گرانے کے لیے کمیٹی نے ٹھیکیدار کمپنی کا انتخاب کرلیا ۔
نسلہ ٹاورکو روایتی طریقے سےگرانےکی تجویز منظور کرلی گئی ہے،کمشنرکراچی کی قائم کردہ ٹیکنیکل کمیٹی نے تجاویز کمشنرکراچی کو بھیج دی ہیں۔
خیال رہےکہ کمشنرکراچی نے نسلہ ٹاورگرانے کے حوالے سے ڈپٹی کمشنر شرقی آصف جان صدیقی کی سربراہی میں 8 رکنی کمیٹی قائم کی تھی، ٹیکنیکل کمیٹی نے مختلف 5 ٹھیکیداروں سے انٹرویوز کرنے کے بعد حتمی فیصلہ کیا ہے۔
انٹرویوز کے بعد تجربہ کار اے این آئی ایکسپرٹ ڈینجرس بلڈنگس کمپنی کی منظوری دی گئی۔
کمشنرکراچی کی ٹیکنیکل کمیٹی کے چیئرمین آصف جان صدیقی سمیت تمام ارکان نے متفقہ طور پر کمپنی کا انتخاب کیا ہے، اے این آئی کمپنی اس سے قبل سپریم کورٹ کی ہدایت پر الہٰ دین پارک سے متصل رائل پارک نامی عمارت بھی مسمار کر چکی ہے۔
مذکورہ کمپنی نے مسکن دھماکے کے بعد اللہ نور اپارٹمنٹ کا حصہ بھی مسمار کیا تھا، نسلہ ٹاور گرانے کے لیے 5 کمپنیوں نے اظہار دلچسپی کی درخواست جمع کرائی تھیں، کمیٹی میں ایس بی سی اے، کے ایم سی، ایف ڈبلیو او اور این ای ڈی یونیورسٹی کے نمائندے شامل تھے، نسلہ ٹاورکو گرانے کی تاریخ کا تعین شرائط منظوری کے بعد کیا جائے گا۔
