09 نومبر ، 2021 
جام اویس کو ہتھکڑی نہ لگانے والے افسر کیخلاف کارروائی ہوگی: کراچی پولیس چیف
09 نومبر ، 2021
کراچی پولیس چیف نے ناظم جوکھیو قتل کیس کے ملزم ایم پی اے جام اویس کو پولیس کی جانب سے وی آئی پی پروٹوکول دینے کی خبروں کو رد کردیا۔
کراچی میں میڈیا سے گفتگو کرتے ہوئے عمران یعقوب منہاس نے کہا کہ ناظم جوکھیو کیس کا مقدمہ اہلخانہ کی خواہش کے مطابق ہی درج کیا گیا اور کیس کی تفتیش بھی میرٹ پر کی جارہی ہے۔
انہوں نے کہا کہ ایم پی اے جام اویس کو وی آئی پی پروٹوکول نہیں دیا جارہا، وہ اس وقت تھانے کے لاک اپ میں ہیں۔
کراچی پولیس چیف کا کہنا تھا کہ جام اویس کی عدالت میں پیشی پر ہتھکڑی نہ لگانے پر متعلقہ افسر سے تفتیش کی گئی ہے اور افسر کے خلاف کارروائی کی جائے گی۔
کراچی میں اسٹریٹ کرائم سے متعلق پولیس چیف نے کہا کہ شہر میں وارداتیں ہورہی ہیں لیکن گزشتہ 2 ماہ میں اسٹریٹ کرائم کا گراف نیچے آیا ہے۔
