12 نومبر ، 2021 
ینگ ڈاکٹرز کے تمام جائز مطالبات تسلیم کرتے ہیں: وزیراعلیٰ بلوچستان
12 نومبر ، 2021
وزیر اعلیٰ بلوچستان عبدالقدوس بزنجو نے کہا کہ حکومت ینگ ڈاکٹرز ایسوسی ایشن کے تمام جائز مطالبات تسلیم کرتی ہے اور ہم نہیں چاہتے کہ ہمارے ڈاکٹرز مسائل کا شکار ہو ں۔
ینگ ڈاکٹرز ایسوسی ایشن بلوچستان کے وفد نے وزیراعلیٰ بلوچستان کو ڈاکٹرز کو درپیش مسائل اور اس حوالے سے تشکیل دی گئی پارلیمانی کمیٹی سے مذاکرات پر پیش رفت سے آگاہ کیا۔
وفد سے بات چیت کرتے ہوئے وزیر اعلیٰ نے کہا کہ ہمیں محکمہ صحت کو بہتر کرنے کی ضرورت ہے، حکومت پارلیمانی کمیٹی کی تجاویز سننے کے بعد ینگ ڈاکٹرز کے تمام جائز مطالبات کو حل کرنے کی کوشش کرے گی۔
وزیراعلیٰ نے کہا کہ ہمیں تمام امور کو اسٹریم لائن کرنے کی ضرورت ہے، محکمہ صحت میں بہتری اور سرکاری اسپتالوں کی حالت بہتر بنانے سے متعلق ینگ ڈاکٹرز ایسوسی ایشن کے نمائندوں سے بھی مشاورت کی جائے گی۔
وزیراعلیٰ نے وفد کو یقین دہانی کروائی کہ ان کے مسائل ترجیحی بنیادوں پر حل کیے جائیں گے۔
عبدالقدوس بزنجو نے ڈاکٹروں پر بھی زور دیا کہ وہ صوبے کے غریب عوام کے وسیع تر مفاد میں ہڑتال ختم کرکے ڈیوٹی پر آ جائیں۔
