کھیل

2025 کی چیمپئنز ٹرافی میں بھارتی ٹیم کا دورہ پاکستان چیلنجنگ ہے: آئی سی سی

24 نومبر ، 2021

اس معاملے میں آئی سی سی کچھ نہیں کرسکتی ، پاکستان اور بھارت کئی عرصے سے دو طرفہ دورے نہیں کررہے: چیئرمین آئی سی سی: فائل فوٹو

انٹرنیشنل کرکٹ کونسل (آئی سی سی ) نے 2025 کی چیمپئنز ٹرافی کے لیے بھارتی ٹیم کے دورہ پاکستان کو چیلنجنگ قرار دیدیا۔

کرکٹ ویب سائٹ کے مطابق آئی سی سی کے چیئرمین گریک بارکلے نے ایک بیان میں کہا کہ 2025 میں بھارت کا دورہ پاکستان واقعی چیلنجنگ ہوگا تاہم اس معاملے میں آئی سی سی کچھ نہیں کرسکتی ، پاکستان اور بھارت کئی عرصے سے دو طرفہ دورے نہیں کررہے۔

چیئرمین آئی سی سی نے کہا کہ مجھے امید ہے کہ کرکٹ پاکستان اور بھارت کے درمیان تعلقات کو بہتر بنانے میں مدد فراہم کرے گی، اگر چہ اس پر کام کرنا مشکل ہے کیوں کہ میں جغرافیائی صورتحال کو کنٹرول نہیں کرسکتا۔

یہ بھی پڑھیں

گریک بارکلےکا کہنا تھا کہ صرف امید کی جاسکتی ہے کہ کرکٹ دونوں ملکوں کے درمیان تعلقات کو بہتر بنانے میں مددگار ثابت ہوگی اور اس کے ذریعے دونوں ملکوں کے افراد ایک دوسرے کے قریب آئیں گے۔

خیال رہے کہ آئی سی سی کی جانب سے پاکستان کو 2025 کی چیمپئنز ٹرافی کی میزبانی دینے کے اعلان کے بعد کرکٹ شائقین تشویش میں مبتلا ہیں کہ اس میزبانی کے بعد آیا بھارت کی ٹیم پاکستان آئے گی یا نہیں؟

اس حوالے سے بھارتی کرکٹ بورڈ بی سی سی آئی کے سابق صدر اور وزیر کھیل انوراگ ٹھاکر نے کہا ہےکہ پاکستان میں چیمپئنز ٹرافی کھیلنے کے حوالے سے فیصلہ وہاں کی سکیورٹی صورتحال سے مشروط ہے، بھارتی حکومت پوری طرح پاکستان کی سکیورٹی صورتحال کا جائزہ لے گی جس کے بعد ہی ہم ٹیم بھیجنے سے متعلق کوئی اعلان کریں گے۔