28 نومبر ، 2021 
سوناکشی کی سلمان خان کے خاندان میں شادی کی خبریں گردش کرنے لگیں
28 نومبر ، 2021
بالی وڈ میں ان دنوں اداکاروں کی شادیوں کا سیزن جاری ہے اور ایک کے بعد ایک اداکاروں کی جوڑی شادی کے بندھن میں بندھ رہی ہے۔
حال ہی میں بالی وڈ اداکار راج کمار راؤ اور پترالیکھا نے شادی کی جبکہ وکی کوشل اور کترینہ کیف کی شادی کی خبریں بھی زبان زد عام ہیں۔
اب بالی وڈ اداکارہ سوناکشی سنہا کی شادی کی خبریں سامنے آئی ہیں۔ بھارتی میڈیا کے مطابق سوناکشی سنہا بالی وڈ اداکار سلمان خان کے قریبی رشتے دار' بنٹی سچدیوا' سے شادی کرنے جارہی ہیں۔
رپورٹس کے مطابق بنٹی سچدیوا سلمان خان کے بھائی سہیل خان کی اہلیہ سیما کے بھائی ہیں۔
بھارتی میڈیا کا کہنا ہے کہ بنٹی سچدیوا اسپورٹس منیجمنٹ کمپنی اور ایک پی آر ایجنسی کے مالک ہیں جبکہ سوناکشی اور بنٹی کو اکثر مختلف پارٹیز میں ایک ساتھ دیکھا گیا ہے۔
تاہم سوناکشی سنہا یا سلمان خان کے خاندان کی طرف سے شادی سے متعلق کسی قسم کی تصدیق نہیں کی گئی۔
