07 دسمبر ، 2021 
علمائے کرام کے وفد کا سری لنکن ہائی کمیشن جا کر سیالکوٹ واقعے پر اظہار افسوس
07 دسمبر ، 2021
حکومتی اور علمائے کرام کے وفد نے وفاقی دارالحکومت اسلام آباد میں سری لنکن ہائی کمیشن کا دورہ کیا اور سیالکوٹ واقعے کی شدید الفاظ میں مذمت کی۔
علمائے کرام کے وفد نے سری لنکا کے ہائی کمشنر سے ملاقات کی اور سیالکوٹ واقعے میں بے دردی سے قتل کیے جانے والے سری لنکن شہری کی موت پر اظہار تعزیت کیا۔
علما نے واقعے کو اسلام اور آئین پاکستان کی نفی قرار دیا۔
وفاقی وزیر اطلاعات فواد چوہدری اور معاون خصوصی عثمان ڈار نے بھی سری لنکن ہائی کمشنر موہن وجے وکرما سے ملاقات کی اور سیالکوٹ واقعے پر گہرے دکھ اور افسوس کا اظہار کیا۔
انہوں نے یقین دلایا کہ مجرموں کو ہر صورت کیفر کردار تک پہنچایا جائے گا۔
دوسری جانب سری لنکن ہائی کمشنر موہن وجے وکرما کا کہنا تھا کہ جس شدت سے پاکستانی قوم نے سیالکوٹ واقعے کی مذمت کی ہے، امید ہے مجرمان اپنے انجام کو پہنچیں گے۔
ان کا کہنا تھاکہ جس طرح سے پاکستان کے علما، حکومت اور عوام نے واقعے کی خلاف غم و غصے کا اظہار کیا ہے اور مجرمان کے خلاف سخت کارروائی کا مطالبہ کیا ہے وہ باعث اطمینان ہے۔
اسلامی نظریاتی کونسل کے اعلامیے میں کہا گیا کہ ناعاقبت اندیش عناصر کی طرف سے اقدام پوری پاکستانی قوم او ر مسلم امہ کی سبکی ہوئی، مجرمان کو سخت سے سخت سزا دی جائے۔
