09 دسمبر ، 2021 
شوکت ترین کے سینیٹر بننے کی راہ میں ایک اور رکاوٹ دور، فیصلہ حق میں آگیا
09 دسمبر ، 2021
پشاور سے سینیٹ کی خالی نشست پر انتخاب کیلئے پاکستان تحریک انصاف (پی ٹی آئی) کے امیدوار شوکت ترین کے کاغذات نامزدگی کے خلاف اپیل مسترد کردی گئی۔
الیکشن ٹربیونل نے شوکت ترین کو خیبر پختونخوا سے سینٹ الیکشن لڑنے کیلئے اہل قرار دے دیا۔
شوکت ترین کے کاغذات نامزدگی کو اے این پی کے امیدوار شوکت امیر زادہ نے الیکشن ٹریبونل میں چیلنج کیا تھا۔
پشاور میں الیکشن ٹریبونل نے خیبر پختونخوا سے سینیٹ کی خالی ہونے والی نشست پر انتخاب کیلئے پی ٹی آئی کے امیدوار شوکت ترین کے کاغذات نامزدگی کے خلاف اپیل پر سماعت کے بعد فیصلہ محفوظ کیا تھا۔
وکیل درخواست گزار بیرسٹر مدثر امیر نے سماعت کے دوران کہا کہ الیکشن شیڈول جاری ہونے پر ووٹر لسٹ منجمد ہوجاتا ہے۔ شوکت ترین کا ووٹ الیکٹورل رول میں درج نہیں ہے۔ الیکٹورل رول میں ووٹ درج نہ ہونے پر شوکت ترین خیبرپختونخوا سے سینیٹ انتخاب نہیں لڑسکتے۔
اس موقع پر پی ٹی آئی کے امیدوار شوکت ترین کے وکیل علی گوہر درانی ایڈووکیٹ نے ٹریبونل کو بتایا کہ سینیٹ کے لیے الیکشن کمیشن کا سرٹیفکیٹ ہی کافی ہوتا ہے، ٹریبونل کے جج جسٹس سید محمد عتیق شاہ نے فریقین کے دلائل سننے کے بعد اپیل خارج کردی۔
