لیاری ایکسپریس وے پر حادثہ، موٹر وے پولیس کی کار سمیت 3 گاڑیاں تباہ
16 دسمبر ، 2021
کراچی میں لیاری ایکسپریس وے پر ٹریفک حادثے میں موٹر وے پولیس کی کار سمیت 3 گاڑیاں تباہ ہوگئیں۔
پولیس کے مطابق لیاقت آباد کے قریب لیاری ایکسپریس وے پر ایک کار خراب ہوگئی تھی، موٹروے پولیس کا عملہ اپنی گاڑی کے ہمراہ حفاظتی اقدامات کی رکاوٹیں لگا کر کار سواروں کی مدد کر رہا تھا کہ سہراب گوٹھ کی طرف سے آنے والی تیز رفتار کار نے بے قابو ہوکر موٹروے کی گاڑی ٹکر ماردی۔
ٹکر اس قدر شدید تھی کہ سرکاری گاڑی کا عقبی حصہ کار ٹکرانے سے تباہ ہوگیا جبکہ موٹر وے کار آگے کھڑی ہوئی خراب مہران گاڑی سے ٹکرا گئی جس سے تینوں گاڑیوں کو نقصان پہنچا اور موٹروے پولیس کی گشتی کار بری طرح تباہ ہوگئی، پولیس کے مطابق اس حادثے میں کوئی جانی نقصان نہیں ہوا۔
