امریکا میں 56 لاکھ ڈالر جعلسازی کے ذریعے حاصل کرنے والا اظہر سرور رانا پکڑا گیا
16 دسمبر ، 2021
کورونا وبا کے دوران امریکا میں 56 لاکھ ڈالر جعل سازی کے ذریعے حاصل کرنے والا اظہر سرور رانا پکڑا گیا۔
امریکی ریاست نیو جرسی میں کورونا وبا کے دوران جعلی کمپنی کے نام پر 56 لاکھ ڈالر کا قرض لینے والے شخص کو پانچ سال چار ماہ قید کی سزا سنادی گئی۔
امریکی ریاست نیو جرسی کے حکام نے بتایا کہ 31 برس کے اظہر سرور رانا نامی شخص کو نہ صرف جیل کاٹنا ہوگی بلکہ رقم بھی واپس کرنا ہوگی۔
حکام کا کہنا ہے کہ اظہر سرور رانا نے اپریل 2020 میں جعلی دستاویزات کی بنیاد پر ایک کروڑ ڈالرز کے قرض کی درخواست جمع کرائی تھی۔ مئی 2020 میں اظہر سرور رانا کو 56 لاکھ ڈالرز قرض کی مد میں دیے گئے۔
چارج شیٹ کے مطابق قرض کی رقم کو اظہر سرور رانا نے ذاتی اخراجات میں استعمال کیا جس میں گاڑیوں کی مشہور برانڈ کی ڈیلر شپ بھی شامل تھی۔
اظہر رانا نے لاکھوں ڈالرز خاندان کے لوگوں کے نام پر پاکستان بھی منتقل کیے۔ اظہر سرور رانا کو دسمبر 2020 میں امریکا سے پاکستان جانے سے پہلے گرفتار کیا گیا۔
