صلاح الدین ایوبی پر بننے والے ڈرامے میں کن پاکستانی اداکاروں کو کاسٹ کیا گیا؟

ایوبی سلطنت کے بانی سلطان صلاح الدین ایوبی کی زندگی پر پاکستان اور ترکی کی پروڈکشن کمپنیز کے اشتراک سے بنائی جانے والی ٹی وی سیریز کے لیے پاکستان سے ابتدائی طور پر 4  اداکاروں کو کاسٹ کرلیا گیا ہے۔

پاکستان اور ترک کمپنی کا صلاح الدین ایوبی کی زندگی پر سیریز بنانے کا اعلان

اس ٹی وی سیریز پر دونوں ممالک کے اداکار اور اسکرپٹ رائٹرز کام کریں گے: کاشف انصاری

ایسوسی ایٹڈ پریس آف پاکستان (اے پی پی) کی رپورٹ کے مطابق ڈرامہ سیریل سلطان صلاح الدین ایوبی کی کاسٹ کے لیے لاہور میں 6 ہزار افراد نے آڈیشنز دیے جن میں سے صرف 62 اداکاروں کو شارٹ لسٹ کیا گیا۔

رپورٹ کے مطابق شارٹ لسٹ افراد میں سے ابھی صرف 4 اداکاروں کو کاسٹ کیا گیا ہے جن میں معروف اداکارہ عائشہ عمر، اشنا شاہ، اداکار فرحان علی آغا اور عدنان جیلانی شامل ہیں۔

پاکستانی اداکاروں کو کاسٹ کرنے کی تصدیق ڈرامے کے شریک پروڈکشن ہاؤس ’انصاری شاہ فلمز‘ کے سربراہ ڈاکٹر کاشف انصاری نے بی بی سی ایشین کو انٹرویو کے دوران کی۔

یاد رہے کہ ایوبی سلطنت کے بانی سلطان صلاح الدین نے صلیبیوں کو شکست دی تھی اور 1187 میں 9 دہائیوں بعد بیت المقدس کو دوبارہ آزاد کرایا تھا۔