شعیب اختر کی والدہ کے انتقال کے بعد چاہنے والوں سے درخواست
04 جنوری ، 2022
قومی ٹیم کے سابق فاسٹ بولر شعیب اختر نے والدہ کے انتقال کے بعد تمام چاہنے والوں سے درخواست کی ہے۔
شعیب اختر نے اپنے سوشل میڈیا اکاؤنٹس پر پیغامات جاری کیے جس میں انہوں نے والدہ کی تعزیت کرنے والوں کا شکریہ ادا کیا۔
سابق کرکٹر نے لکھا کہ ماں جی اب ہم میں نہیں لیکن ان کی دعائیں اور دیے گئے اسباق ہم سب کے ساتھ رہیں گے۔
شعیب اختر نے مزید کہا کہ ملک بھر سے آنے والے تمام بہن بھائیوں کا بہت مشکور ہوں، کورونا کی پھر سے بگڑتی صورت حال کے پیش نظر درخواست کروں گا کہ ہم گھر والوں کو کچھ وقت اکیلے درکار ہے، اس لیے اب بس جہاں ہیں وہاں رہتے ہوئے والدہ کے لیے دعا کریں۔
واضح رہے کہ شعیب اختر کی والدہ کا انتقال 26 دسمبر 2021 کو ہوا تھا۔
