کراچی: ڈکیتی کے دوران ماں اور بہن کے سامنے نوبیاہتا نوجوان قتل، ویڈیو سامنے آگئی
12 جنوری ، 2022
کراچی میں ڈکیتی کے دوران ماں اور بہن کے سامنے نوبیاہتا نوجوان قتل، سی سی ٹی وی فوٹیج سامنے آگئی۔
کراچی کے علاقے پاکستان ایمپلائز کو آپریٹو ہاؤسنگ سوسائٹی (پی ای سی ایچ ایس) میں کشمیر روڈ کے قریب ایک گھر کے باہر ڈکیتی کے دوران مزاحمت کرنے پر ایک ملزم کی فائرنگ سے نوبیاتا نوجوان جاں بحق ہوگیا۔
واقعے کی سی سی ٹی وی فوٹیج کی مدد سے پولیس نے اس واقعے کی تفتیش شروع کر دی ہے۔ پولیس کے مطابق واقعہ پی ای سی ایچ سوسائٹی میں کشمیر روڈ پر اسپورٹس کمپلیکس کے قریب پیش آیا۔
واقعے کی سی سی ٹی وی فوٹیج میں دیکھا جا سکتا ہے کہ ماں اور بیٹی رکشے میں گھر کے باہر پہنچتی ہیں کہ ایک موٹر سائیکل سوار ملزم انہیں گن پوائنٹ پر گھیر لیتا ہے۔
اس دوران ایک خاتون نے گھر کی گھنٹی بجائی، رکشا ڈرائیور اس موقع پر فرار ہوجاتا ہے جبکہ ڈاکو ایک خاتون سے سامان بٹورنے میں مصروف ہوتا ہے۔
واردات کے وقت اسی گلی میں موجود سکیورٹی گارڈ نے بھی خواتین کی کوئی مدد نہیں کی۔ اتنے میں خاتون کا بیٹا شاہ رخ اچانک دروازہ کھول کر باہر نکلتا ہے اور ڈاکو کی جانب لپکتا ہے۔ یہ دیکھ کر ملزم اس پر فائر کرکے موقع سے فرار ہوجاتا ہے۔
زخمی شاہ رخ کو فوری طور پر جناح اسپتال منتقل کیا گیا تاہم وہ جانبر نہ ہو سکا۔ پولیس کے مطابق متوفی کار شو روم چلاتا تھا جس کی چند روز قبل شادی ہوئی تھی اور گھر میں ان دِنوں ولیمے کی تیاری ہو رہی تھی۔
نوبیاہتا شاہ رخ کی اچانک موت پر گھر میں کہرام مچ گیا ہے۔ پولیس کے مطابق سی سی ٹی وی فوٹیج کی مدد سے ملزم کا سراغ لگانے کی کوشش کی جا رہی ہے۔
