تعریف سے کارکردگی بہتر ہوتی ہے، وزارتوں کو کارکردگی مزید بہتر کرنا ہوگی: وزیراعظم

وزیراعظم عمران خان کا کہنا ہے کہ تعریفی اسناد سے کارکردگی بہتر ہوتی ہے اور وزراء کو کارکردگی مزید بہتر کرنا ہو گی۔

بہترین کارکردگی دکھانے والے وفاقی وزراء کو تعریفی اسناد کی تقسیم کی تقریب سے خطاب کرتے ہوئے وزیراعظم عمران خان کا کہنا تھا تمام وزارتوں کو پتہ ہونا چاہیے کہ کس نے کتنا کام کیا۔

معاون خصوصی ارباب شہزاد کو مخاطب کرتے ہوئے وزیراعظم کا کہنا تھا کہ ارباب شہزاد آپ نے غلطی کی کہ پہلے بتا دیا کہ ٹاپ ٹین وزارتیں کونسی ہیں، جن وزراء کے نام نہیں ہیں وہ یہاں موجود نہیں ہیں، آئندہ آپ نے کسی کو نہیں بتانا جب تک پروگرام نہ ہو۔

وزیراعظم کا اپنے 10 بہترین کھلاڑیوں کیلئے ایوارڈ، مراد سعید کا پہلا نمبر

کارکردگی کی بنیاد پر مراد سعید کی وزارت مواصلات کا پہلا نمبر رہا

عمران خان کا کہنا تھا کہ تعریفی اسناد کی تقسیم سے کارکردگی بہتر ہوتی ہے، سزا و جزا کے بغیر کوئی سسٹم کامیاب نہیں ہو سکتا۔

وزیراعظم نے مراد سعید کو پہلے نمبر پر آنے پر مبارک باد دیتے ہوئے کہا کہ وزارتوں کو کارکردگی مزید بہتر کرنا ہو گی۔

ان کا کہنا تھا کہ ساری دنیا میں منہگائی ہے اور قیمتیں اوپر گئی ہیں، ہمیں برآمدات کے فروغ سے ملک کی معیشت کو مضبوط بنانا ہے۔